智取大市 - 晉佳 2019年2月4日
智取大市：中港股市賭國運 - 晉佳
中央連環推措施引資入A股。 適中字型 較大字型
相比中美談判呢個重大而難有驚喜嘅消息嚟講，上周有唔少重要嘅中國金融新聞。RQFII同QFII未來將會合一，A股平倉線130%打算取消，兩項消息反映中央未來想吸引資金押注喺A股，先挖好條隧道，等資金他朝衝入A股。人行一眾高官接受內地傳媒訪問，講到人行無必要QE，但貨幣政策有效性遠遠未達到邊界，影子銀行規模下降，反映貨幣政策仲大大有發揮空間。
連環措施引資入A股、放水、內房調控鬆綁，政策套路似足2014至2015年，又滬港通又公募基金投資股市等等，能否再一次有成效當然是未知數，兩個時期大不同係中美糾紛呢個超大負面因素。為咗賭國運中國決定博一舖，後果會點，一係做完都冇用，經濟、金融信心刺激不來；一係做過籠，催生更大泡沫，到時再搵方法收拾殘局。以中國大戶貪婪而向來幾乎無視風險（已經比以前審慎）嘅劣根性，市場中短期內照計當呢個係機多過危，估就估催生泡沫機會高過一半。
要睇有冇泡沫？首先睇睇2月底嘅90日停火期滿前後嘅市場反應，指數、股價會否一浪高過一浪？另外就要睇成交有冇明顯增加。如果泡沫成真，1月反彈睇怕小菜一碟。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com