笑到最後 - 高明 2019年2月4日
笑到最後：負資產重臨又如何 - 高明
上季負資產住宅按揭貸款262宗。 適中字型 較大字型
金管局公佈，2018年第4季負資產住宅按揭貸款262宗，係2016年第4季以來再次錄得負資產個案。因為負資產呢件事，好多人都經歷過，包括高明在內，都明白到負資產係一個好痛苦嘅過程，供死會而未必會有盡頭一日，所以反應較大亦都好正常。
不過，負資產宗數對樓價嘅啟示，高明認為接近冇啟示。點解？因為有負資產只係客觀咁顯示有人高位買貨坐咗艇，用另一種計算方法去演譯樓價下跌，只係樓價嘅結果，前瞻性欠奉。道理等於買隻股票，T+2前篤一篤，買入之後跌咗一個價位，立即負咗資產，咁又如何呢？第二日入返條數咪得囉。而入唔入得返條數，先係問題。
樓市上解決入唔入得返條數，首要條件係失業率，最新失業率低見2.8%全民就業，呢一點好難入唔返條數。
更重要原因，係人心未死。無論香港人做乜呻乜，大部份嘅結論，都係「樓價太貴、冇錢買樓」。過去十年嘅樓價升幅，已令香港樓市變成一個宗教，買樓等於信者得救。現實係，越早買，就算只係買自住樓，對抗加租嘅壓力越細，就好似以前西洋傳教士來華，唔單止傳福音，教堂仲有牛奶麵包派，梗係信咗先講啦。成為坊間所矮化嘅「樓奴」，擁有嘅經濟自由竟然大過信誓旦旦唔入教嘅「非樓奴」，「樓奴」唔單止未死心，「非樓奴」搵緊張form入教。
至於乜嘢先係樓價終極轉勢？就係人心嘅轉變，但人心並無可能量化，宗教亦並非數學，勉強去量，就只有靠未來外母。當一個女仔帶男朋友返屋企見家長，唔再認同男人有樓等於成功，男人冇樓先係成功人士，先畀個女嫁畀佢，先會打破買樓係宗教嘅印象。但97年後，有樓的確係負擔嘅代名詞，女人嫁畀個有會供緊嘅男人，會覺得要同佢捱。
至於負資產數字，只係滯後數字，唔使太緊張，外母點睇先緊要。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com