【大茶飯】股市同經濟脫鈎？（青冰）
美債息率倒掛，係近期的壞消息，不過同好多其他的壞消息一樣，都係較短命而很快被人遺忘，究竟仲有咩消息可以打散個市呢？
上月騰訊(0700)出業績，可算係近年最曳的一份季績，遜預期之餘，管理層都冇以前咁樂觀，幾星期後，南非股東突然出彈弓手，打算將科技業務打包
上市，變相將騰訊減持，幅度比去年批股仲大好多添，如果用數學層面計，去年減2%已經跌百幾蚊，今次減逾7%，股價豈不是要見兩位數？不過你睇返上星期的股價，已經升近380蚊，係8個月新高，究竟應該信壞消息，還是信股價，就睇閣下是好友定淡友。
一月時誠哥在公開場合講過，今年環球經濟會差，仲叫大家要小心啲，3個月過去，美國啲數據係時好時差，所以先令到聯儲局轉鴿，中國經濟就好似重新上路咁，PMI大為轉好，英國脫歐脫了N年仲未脫到，最神奇嘅係，之前亂局，市場理解為英國經濟有重大不明朗因素，不過現時愈拖得耐，投行已紛紛認為，愈拖愈不會脫，即使冇180度轉軚，都差不多175度了。係世界經濟轉變得太快，還是誠哥睇錯市，看來要過多半年先答到你。
股市同經濟無疑是息息相關，好多人都根深柢固地認為，經濟好，股市才會好，幾十年前的，青冰答你唔到，但觀乎近十幾年，兩者的關連愈來愈模糊，你話中美經濟好好咩，應該唔算係，但美股這隻老牛仍然不死，現在連中港股市都技術性進入牛市喇，問你死未。雖然股市永遠走在經濟之前，但你睇返去年咁跌法，今年咁升法，如果真係反映緊經濟周期，咁個周期真係超短囉。
很多投資者亦好喜歡糾結在「牛市」二字，成日會問究竟現在是否牛市，其實個答案係咪咁重要呢？牛市就買貨，熊市就沽貨，係咁簡單就正喇。如果係牛市，仲會好著緊現在是牛一、二定三，因為牛三代表就來爆煲，唔買之餘仲要走貨添。
作為實戰型的青冰，很少會糾結在經濟及牛市當中，只會留意有利好消息啲股是否大升，有壞消息啲股是否唔跌，如果兩者皆是，戰友應該識點做啦。
P.S. 青冰下星期起外遊兩周，本欄將休息至4月29日
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com