冰說聰明 - 青冰 2019年5月23日
馬上成為壹會員
會員註冊/登入
【冰說聰明】亂炒稀土離曬譜 - 青冰
習總（右）星期一參觀江西的稀土企業，翌日中港股市喪炒稀土概念股。 互聯網圖片 適中字型 較大字型
習總星期一在劉鶴的陪同下，參觀江西的稀土企業，翌日中港股市便喪炒，A股上市的漲停，在港上市的概念股就單日升一倍，中國稀土（769）個名改得實在好，又易入腦，一眾炒鬼蜂擁入場。話說N年前又係有稀土危機，曾經同老婆講過稀土的用處，佢話聽落呢隻中國稀土大有前途喎（笑），早幾日睇嚇個圖，原來已經是八年前的事，當日股價最高是接近4.1元，換言之，用星期一個價計，八年來跌咗九成。
中國稀土最近七年都係蝕錢，去年最少喇，只係蝕七百萬，只要你細心啲睇，會發現佢哋係冇自家礦場的，原材料稀土由東南亞入口。而近期上市的星宇控股（2346）食正熱潮，源於招股書內，搵到稀土兩個字，不過稀土都係公司的原材料，在上市文件的風險因素中，講明業務表現取決於以合理價格獲得稀土供應，稀土價格大幅波動會影響業務及財務狀況，寫到咁白都要炒，真係好牽強囉，但冇計，股票吸引人之處，就是適當時候非理性亂咁炒嘛。
稀土作為國家的寶貴資源，在2011年已為發展定下基調，提出由六間企業作為主體，分別是北方稀土、中國五礦、中鋁、贛州稀土，廣晟有色及廈門鎢業，當中四間已在內地上市，星期二全部都漲停啊。而中鋁集團旗下的稀土公司，在去年5月向中證監遞交上市申請，到𠵱家都未正式上市，睇返股權結構，中鋁集團持有53%股份，而在香港上市的中鋁（2600）都持有15%，這也有在中鋁的年報內披露，暫時只列在股權投資，換言之，其實中鋁都係一隻稀土概念股，邏輯上更比上文提及的兩隻來得實在，點講都係有個礦做開採，屬上遊業務，仲係國家指定企業㖭。
之不過有邏輯又唔一定大炒，你睇十年前油價140蚊時，中石油（857）升得多，還是蒙古能源（276）吖？
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com