港鐵主席避險有一手
2019年05月23日
中美貿戰膠着，市場炒作概念過日辰，晶片股同5G概念股拾級而上，中芯國際(981) 收升5%，報9.07元；華虹半導體(1347) 升7.5%，報16.48元。公用股都係煤氣(003) 最叻，逼近20元兼創新高，收報19.7
元，升1.4%，估計大戶仲係順手炒除淨送紅股。恒指收報27705點，升48點；國企指數收報10604點，跌30點，成交金額僅764億元。
港鐵與高位僅差2%
市場近日找尋避險股，當中一隻係半公用半地產嘅港鐵(066) ，噚日港鐵股東會係主席馬時亨最後一次主持會議，氣氛似乎唔錯，馬時亨任內雖然發生咗紅磡站月台風波，但無礙盈利同股價，小股東似乎都幾滿意。經過一輪波折後，月台炸彈應該拆得八八九九，交棒風險應該大減。港鐵噚日收報48.45元，微跌0.4%，同今年高位49.5元只差2%。
馬時亨臨別秋波主持股東會，佢不諱言關注今年3月荃灣線測試新信號系統時，兩列列車喺中環站附近發生碰撞事件，已要求管理層嚴肅跟進事件。講到紅磡站工程安全問題，佢坦言工程表現的確不符預期，公司將積極回應，與相關承建方繼續合作，以求盡力改善解決問題。
陸羽仁早前問過港鐵最高層點睇紅磡站風波，是否已進入尾聲，皆因獨立調查委員會報告確認月台無危險，毋須重新拆卸興建，議員對拆台要求亦收斂，最大風險似乎有平息跡象。港鐵最高層話獨立調查委員會報告結論確係好重要，若然要拆台，咁通車時間同成本都難以控制，現在調查委員會初步報告確認安全，往後委員會工作，好積極投訴的中科唔會參與，相信爆料炸彈應該拆得七七八八。
問到紅磡站事件會否影響以後港鐵承造新線，最高層坦言公司替政府監工建新線，其實只係捱義氣，根本無錢賺，政府唔搵港鐵監督，可以公開招標搵其他公司做，外國都有例子係成立獨立項目公司建造新線。從港鐵角度，過去幾條新線一齊揹上身，工作量超負荷，吸取呢個教訓，將來最多只可同時做兩條新線。對港鐵而言，發展鐵路必須有補貼，政府只要維持鐵路加地產的補貼模式，港鐵都有角色。事實上，現時鐵路逼爆，當局已在研究在大嶼山、屯門等地起新線，所以未來公司應該仲有發展空間。
聽完最高層分析，港鐵喺馬時亨時代應該已經清理大部份前朝炸彈，可以重新出發。港鐵近年批出接近兩萬個上蓋單位，未來陸續入帳，條數唔會差，所以時亨哥臨走都送個禮給市民，宣佈延長優惠。拆完港鐵嘅局，你應該明白點解呢隻風波股原來已經走咗入地底，所以出面橫風橫雨都可以避險，吸引到資金去買。
鷹君股價定過抬炸彈
最後講講鷹君(004) 官司，鷹君羅老太百歲爭家產，結果一如預期敗訴。老人家一把年紀仲為錢上公堂，好多時都係為仔女爭，今次都唔例外；不過，法官考慮嘅唔係人情，而係法律，牌面睇老太勝算唔高，所以結果唔令人意外。由於鷹君管理狀況唔會出現改變，估計股價都唔會有咩特別反應，定過抬炸彈。鷹君昨日收報34.05元，升1.6%，以2.4厘回報率計，每股資產帳面值達99元，都算係穩陣一族。
陸羽仁
金融High Tea - 陸羽仁 舊文
來源 source: http://hdfin.stheadline.com