操盤手札記 - 割柑人 2019年6月25日
【操盤手劄記】娥六招周年啟示 - 割柑人
新世界發展主席鄭家純。 資料圖片 適中字型 較大字型
G20峯會周五開鑼，習特會係重頭戲，雙方埋枱講數，有得傾就有轉機；不過，毋須過份憧憬。美國6月17日至25日就徵稅召開聽證會，之後有一周抗辯期，意味最快7月2日生效！
港股下半年食粥食飯，主要睇兩瓣：
一、習特會成敗；二、聯儲局減息。習特會市場預咗頂多握下手，講句繼續傾，市場已收貨。至於聯儲局，利率期貨顯示7月減息機會達100%，美滙指數跌穿長期上升軌亦反映快將減息。
大環境睇上述兩瓣，小環境要睇《逃犯條例》修訂引發嘅連串示威，一旦惡化，勢必影響市場氣氛。睇番歷史，中國逢九必亂，而由示威引發嘅就有：1989年六四事件、1999年法輪功事件、2009年新疆騷亂，今年輪到香港，點樣收科，睇林鄭囉！
G20習特會當前，美方上周放風特朗普將香港議題納入討論清單；不過，中方本周吹風，強調中國唔允許喺G20討論香港，此舉令市場擔心影響氣氛，資金翻炒減息憧憬，港股周一微升0.14%，收28513，靜待周四期指結算同周五、周六G20習特會。
若習特會無反枱，人民幣同A股繼續回勇，港股後市有望挑戰小雙底頸線量度升幅29000水平，呢個位亦係4月15日高位30280跌至6月4日低位26671反彈黃金比率61.8%，以及5月9日下跌裂口回補嘅交滙點。
林鄭舊年6月29日推出「娥六招」新房策，一年下來，樓價唔見受壓，地產股則越升越有，四大地產商中，恒地（012）、新地（016）、新世界（017）升近兩成，長實（1113）則較遜色。喺減息憧憬下，地產股又炒上。美銀美林發表報告睇好地產股，首選新世界。該股上周三以上升裂口突破下降軌，至今仍守穩其上，走勢唔差。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com