金手指 - 孫柏文 2019年6月25日
【金手指】股東抗議其實有用 - 孫柏文
俄鋁主席Zonneveld（右）上周四股東會後，主動搵孫柏文傾偈。 孫柏文提供圖片 適中字型 較大字型
上周，孫柏文喺本欄曾經預先宣佈會去上周四嘅俄鋁（486）股東會，同時話過我會著住件印有「冇息派、冇計傾、Where"s Our Dividend？」嘅T恤去。我諗住分分鐘俾實Q阻止入場，但居然順利畀我開會。到股東發言時間，我第一個舉手，我一起身，在場人士見到我件T恤都笑一笑。
我哋呢啲香港人，當主辦單位聽意見嘅panel坐咗梁愛詩（俄鋁獨董）喺到，心裏都會有個佢哋將會當我發噏風嘅感覺。不過，我都照樣分享對業務、現金流、俄鎳股權等嘅睇法，特別係喺舊年，我哋呢啲香港股東都受盡欺淩，但都不離不棄，忠心如一。我最尾問：「所以今日我條問題係，我哋啲派息呢？」一問，在場嘅股東們，即時熱烈鼓掌！我好滾動啊。
佢哋嘅財務總監答，計過數，如果鋁價喺現水平企穩，就應該派。咁佢哋歷史都係每年中期業績派一次息，即係可解讀成鋁價到八月尾，董事局坐埋睇中期盤數時唔再跌，就會派。
當然，呢啲都係估估嚇。我覺得佢哋會派嘅最大理由，就係主席Zonneveld一宣佈散會，就即刻走埋來搵我傾。當我問佢可否合照時，非常歡迎（上周五李華華登咗上報）。試問，一個二月先上任，到中期都冇派息諗頭嘅公司主席，會唔會敢一散會就搵著住嗰件T恤嘅股東傾偈合照呢？咪就係囉。市民抗議多數唔work，希望股東抗議得啦。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com