嘉里養地準備收割
2019年06月25日
本周五召開的G20集團峰會，焦點之一係中美元首會面，大行事前都為習特會降溫，認為唔會有好大突破。
專門玩沽空嘅研究機構渾水更加係大潑冷水，直言大家唔好寄望過高，港股經過上周急彈後，喺會前反應都轉趨平靜。
渾水研究創辦人布洛
克喺G20會議前提出，中美雙方唔會和解。近期內地官媒評論文章亦顯示，中方態度變得更強硬，反映中方已準備好，要同西方國家作長期地緣鬥爭。他的觀點本來都幾正路，不過，大家都話渾水擺明係出口術搵食，忽然之間咁講，好似好驚中美可以達成協議，莫非係做咗好多淡倉，驚會畀人夾死，所以急急出嚟唱淡？
一個項目賺兩次
市場有呢個解讀不足為奇，皆因渾水除咗沽空個股獲利外，近期都經常做中國經濟淡友，不斷話內地債務遲早爆煲，從其言行估計應該都造淡中國債務或者人仔，所以睇法有預設立場，絕不出奇。
渾水加上好多大行事前都唔敢對習特會有過高期望，從美國總統特朗普過去反覆作風，大家都留有一手，市場焦點暫時仲係集中炒減息，所以噚日本地地產股表現稍強。
美國利率下調，「明日大嶼」又因為引渡條例一鑊泡變得不明朗，就算看好地產股，大家都要留意有土地儲備嘅公司，所以好似新地(016) 、恒基(012) 相對強勢。政府可以拍賣土地有限，有發展商就發掘手上可以重建嘅資產。
早前嘉里物流(636) 就宣佈出售屬下物業予嘉里建設(683) ，呢個做法可以話係禮失求諸野，政府無地賣，嘉里物流就將名下有潛力項目出售。
早前公司宣佈以22.7億元和13.3億元，分別出售柴灣貨倉及沙田貨倉予嘉里建設，出售事項所得款項總淨額36億元，估計出售收益(扣除有關費用前)分別為14億元及6億元，合共約20億元。未來嘉里物流可供出售項目仲有幾個，所以套現所得除咗減低負債外，仲有條件派發特別股息。
目前嘉里建設持有嘉里物流近60%股權，出售有潛力重建物業予母公司，即時可以產生盈利，將來派發股息，母公司又可以較少資金取得發展項目，起好樓出售再賺多一次，條數相當易計。喺香港做物流業賺錢不多，但勝在可以養住塊地，等候收割。現在政府覓地困難，發展商如果可以有地拿出來重建，政府自然歡迎，條件比以前好商量，所以近日嘉里兩間公司股價表現不俗。嘉里建設昨日收報32.75元，升3.3%，息率仍有4.1厘；嘉里物流則收報13.7元，升2.7%，息率2.7厘。
大灣內房股有勢
內地股市個別發展，上證指3000關失而復得。上證指數連續第六日靠穩，收報3008點，升0.2%；深證指數收報9212點，跌0.02%。港股基本上浮浮沉沉，下午一度微跌，恒指收報28513點，升39點；國企指數收報10952點，漲31點，但交投好淡靜，成交金額僅698億元。
其他地產股都造好，信置(083) 升0.6%，報13.5元；恒地(012) 升2.8%，報43.45元。
內房股造好，尤其是擁有大灣區概念更跑出，市場憧憬廣東省財政廳公佈大灣區人才政策，有望刺激對灣區內住屋需求，其中奧園(3883) 破頂，一度升至11.06元，飆升6.8%，全日收報10.98元，升6%；新城發展(1030) 升7.2%，收報10.48元；碧桂園(2007) 一度升至12.24元，創一個月高，收市升1.4%，報11.96元。
陸羽仁
金融High Tea - 陸羽仁 舊文
來源 source: http://hdfin.stheadline.com