操盤手札記 - 割柑人 2019年8月6日
【操盤手劄記】瀨咗鑊全民埋單 - 割柑人
內地唔止搞「債轉股」，仲搞「儲蓄轉股」，內銀壞賬問題應該好大鑊。此舉即係迫債主同存戶做股東，14億人民埋單。 資料圖片 適中字型 較大字型
自從1925年反抗英國帝國主義觸發省港大罷工，近百年嚟，香港罕見再有政治性質罷工。八五罷工朝早，特首林鄭反而喺龜縮兩周後「復工」，例牌譴責，懶理訴求。修例問題已變管治問題，警民對立，社區爆發。沙士點解大鑊？就係社區爆發！
靠拖字訣，難以解決。政府玩拖，市民還拖，街頭衝突惡化。據講，今年中共高層喺北戴河避暑，將會傾嚇香港內憂、貿戰外患，林鄭似乎等緊聖旨。北戴河會議前，上周三中美貿易代表甫喺上海灘道別，上周四特朗普旋即反面，宣佈對中國貨品追加關稅。
受到街戰激化、貿戰激化影響，中港股市周一分別急跌1.6%同2.9%。恒指收26151，已接連跌破三角形支持同前浪底支持，就算短線因超賣而出現技術性反彈，中線跌勢未止，有機下試年初低位25000水平。
美國新一輪關稅，係9月1日起對剩低嘅3,000億美元中國貨品徵稅10%。今趟「無差別攻擊」，涵蓋各類消費品，重災區係手機、電腦等科技產品，iPhone都中招。不過，舊年4月中美貿易戰爆發以嚟，人民幣已貶值超過10%，實際已對沖10%關稅。
踏入8月，港股進入藍籌業績期，有乜閃失，就更大鑊。現時除咗零售、旅遊、收租、地產、出口、科技等股份運滯，就連金融股，尤其內地銀行股，都冇運行！皆因內地唔止搞「債轉股」，仲搞「儲蓄轉股」，睇嚟內銀壞賬問題好大鑊。
有幾大鑊？傳聞內地有流動性風險大嘅銀行黑名單，主要係中小銀行，已經爆鑊嘅有包商銀行、錦州銀行（416）、天津濱海農商銀行；大銀行就要孭起拯救責任，上周工商銀行（1398）就入股錦州銀行。債轉股、儲蓄轉股，即係迫債主同存戶做股東，14億人民埋單。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com