智取大市 - 晉佳 2019年9月9日
【智取大市】中國自製貨幣死穴 - 晉佳
一般人對人民幣嘅信任程度，來自一買一賣，從來冇乜聽過有外國人買中國資產作退休、資產傳承之用。 資料圖片 適中字型 較大字型
中國，係一個擁有強勁經濟地位嘅國家，至於貨幣地位，卻遠遠及不上經濟地位相若嘅美國，大家信歐元、日圓，都多過人民幣。大家對人民幣嘅信任程度，來自一買一賣，而中國作為全球最大內需市場，投資者最長線係想同中國建立合作夥伴關係，而你係從來冇乜聽過有外國人買中國資產作退休、資產傳承之用。
正正因為中國人治淩駕法治，大家看在眼內。大家知道去到某個有法治嘅國家，如何為之奉公守法，但中國把尺又鬆又緊，外資永遠唔知自己幾時唔夠舔共，令你嘅人身安全同資產受威脅，國泰（293）就係一個典型例子。一黨專政之下有唔同派系，作為中國有錢佬亦唔知自己靠山玩到幾耐，啲錢流出中國、變做美元，先係自己嘅錢。於是中國只係有經濟地位，而缺乏鞏固嘅貨幣地位，近期更加係行倒車。
中國點樣先會有領先嘅貨幣地位，難矣，一個靠人治去建立嘅體系，走上不歸路，近年仲要引入人面識別、社會信用評分，評分欠透明度，進一步遠離提升貨幣地位嘅路。如果AI、大數據能夠令中國經濟更富強就還頂得住，除非他朝中國經濟地位勁到遠遠拋離美國、歐元區，否則外國人長遠只信你嘅經濟地位，唔係信你貨幣地位，如果連經濟地位都動搖，就冇信任可言。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com