【大茶飯】玩爆炒新股 最重紀律（青冰）
玩爆炒新股 最重紀律更多
說起港股的大師，大家很自然想起主力唱淡的沈大師，但近日就出現咗另一個大師，係一間新上市的公司，叫魯大師(3601)，是奇虎360旗下的，業務大致係個人電腦的系統監測，性能測試及清理優化之類。作為新股，估值是否吸引，業務有
冇前景，固然重要，但經驗話畀青冰知，炒唔炒係另一回事，而魯大師就證明咗，佢係屬於爆炒系列。
新股爆炒，同萬人空巷的人氣新股，有明顯的區別，後者係多人參與抽，勁爆超購，獲分派的股數少，之後無論暗盤及正式開市，都係裂口高開，但往後的水位都係有限。而青冰所指的爆炒新股，招股反應唔錯，但未至於好熱，上市後先至起步大炒，基本上你冇抽都唔係問題，只要上市後肯追就得，而近年的例子，近嘅有中煙(6055)，遠些少的是希瑪眼科(3309)及美圖(1357)，如果戰友上市後先入場，仍然有以倍計的利潤。
炒這些股，只有兩個法則，就是計數及紀律，青冰覺得後者至為重要，如果戰友自覺執行力較差，容易猶豫，就千萬不要跟人衝了。所謂計數，不是計市盈率及盈利增長，因為這些只會影響中長期走勢，話明爆炒，大家都係在乎幾日而已，咁有咩數好計呢？成交固然重要，街貨量及轉手比率亦應重視，但青冰的習慣是用上市首天的加權平均價，簡單啲講，這個就是首天炒友入場的平均價，現價離這個價愈遠，即係利潤夠厚，相反而言，跌得穿呢個價，即係大部分人都係蝕錢貨了，仲講咩爆炒呢？
中煙首天的加權價係5.268元，希瑪係5.381元，美圖是8.526元，中煙及希瑪在上市翌日收市都大幅高於首天加權價，之後便開始倍升之旅，美圖開市幾日就穿，而真正的大炒就出現在3個月之後。不過大家都有一個共通點，無論是上市即炒，還是3個月後先炒，都係只此一次。
炒股指標有千百樣，但即使吹到天花龍鳳，最重要還是落場的實證及執行紀律，有指標而唔跟住做，甚至將自己當刻的觀點淩駕個指標，都係學壞手勢。講完一大輪，提返你魯大師首天的加權價係6.438，上市翌日高見11.16元後倒插8%，究竟玩完未？留待市場這兩天答你，如果道氣打窒咗，就冇必要鬥氣及留戀，畢竟今個月還有不少新股上場啊。
大茶飯 - 青冰 舊文
來源 source: http://hk.finance.yahoo.com