智取大市 - 晉佳 2019年10月14日
【智取大市】信周期股定增長股 - 晉佳
魯大師上周上市後熱炒。 適中字型 較大字型
香港局勢可測性開始上升，迎來中美局部協議，港股上周五已偷步爆升600點，周期股同弱勢股大反攻，人氣增長股回吐。究竟追入周期股定係趁回吐撈增長股，呢一刻難一概而論，應該逐隻股份審閱，就算係增長股，都會升至接近天花板之時，呢個時候會有更多投資者加入沽貨，獲利換馬去買其他上升空間較大嘅股份。
未來大半年，投資市場仍會面對美國對中國股票投資增加限制嘅可能，同埋國企南下侵吞香港市場，加上中美經常傾好協議後又變臉，窒礙周期股未來數月表現。經驗告訴大家，天花板較高嘅增長股，無論喺波動市，定係喺幾個月升市，都有得升，相對周期股容易操作。
近期新股突然熱炒，有賴同於上周四上市嘅魯大師（3601）同滔搏（6110）以離奇低估值定價，令股價上市後有空間炒上，之後一日鑫苑（1895）乘勢上市照樣跟炒，但論質素同上市估值並無大平賣情況，於是鑫苑炒高半個鐘隨即派貨。
魯大師盈利有增長但業務潛力有限，歷史市盈率炒到30倍樓上已收夠籌，後市繼續大波動。滔搏計落歷史市盈率24倍左右，配合兩成左右增長率，加上運動用品股當時得令，短線仲有空間。新股要逐隻秤，不宜盲跟風。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com