智取大市 - 晉佳 2019年12月27日
【智取大市】明年港股新地雷 - 晉佳
去到2019年尾，美股較貿易戰前明顯上升，拉長咗美股牛市生命，難怪各界預期特朗普明年能夠成功連任。資料圖片 適中字型 較大字型
2019年算係股市比想像中平穩嘅一年，大家進一步適應貿易戰，令股市波幅減低。貿易戰為阻止中國上位取代美國成為全球一哥之餘，美國似乎順便利用貿戰消息，配合貨幣政策去調節市場預期，變相增加美國調節市場嘅手段，從而令美股免生泡沫。去到2019年尾，美股較貿易戰前明顯上升，拉長咗美股牛市生命，反映呢招其實管用，難怪各界預期特朗普明年能夠成功連任。
踏入美國大選年，繼續呢種操作機會甚大，2月美國總統初選展開，選民意向固然影響美國對華施壓力度，目前中美準備簽署首階段協議，亦絕不能以為壞消息已見底，因為美國喺控制市場預期之下，頗大機會喺大選前重新向對華進口貨加徵關稅，港股總會面對類似今年經歷嘅衝擊。
港股低估值為市場築起護城河，市賬率浮沉喺大約1.2倍水平，於是喺貿戰、中國經濟放緩以至社會事件等等因素，都難觸發股市大跌。至於明年會否有新元素，對中港股嚟講，民企違約危機可能係下一年加劇。年底前山東如意呢類民企有國企包底，唔知包得幾多次。民企違約最可怕之處在於民企之間貸款進行互保，一間爆煲就會引發火燒連環船，進而形成信心危機，掀起恐慌嘅話，隨時令恒指明年某段時間出現逾3,000點跌市，呢單嘢要小心。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com