【大茶飯】疫情當災股見底了？（青冰）
【大茶飯】疫情當災股見底了？（青冰）
2月最當炒的必定係抗疫概念股，上周升勢擴散至冷門一些的股。更多
2月最當炒的必定係抗疫概念股，上周升勢擴散至冷門一些的股，再加上香港電視（1137）事先張揚的批股，向市場拋下一個震撼彈，龍頭股率先倒下，其餘跟風炒
作的亦有見散水跡象，正如上周在本欄所講，HKTVmall或可受惠購物習慣改變，但其他糧食家品股，刺激短暫，跟炒也要識落車啊。
無論在國內及本港，飲食業肯定是當災股，打邊爐家族事件後，嚇怕唔少人，專家建議減少外出用餐，減少被傳染的風險。唔少戰友（包括青冰）預期，海底撈（6862）及九毛九（9922）等國內餐飲股，應該要狠狠地再跌一棍，點知市場就同你開玩笑，急跌後企穩，以上周計仲倒升。
海底撈挫兩成後反彈
戰友可能會話，有冇搞錯呀，肯定托住啦，現在全國停業喎，乜收入都冇喎，蝕租蝕人工都蝕死佢啦。這個當然是事實啦，但股票市場有樣嘢，叫做股價反映咗，係好抽象的，亦沒有一個科學程式去計出來，一個壞消息會令股價跌幾多，先叫做反映咗呢，例如海底撈，由上月高位跌至今月低位，約20%，悲觀者認為，冇咗咁多收入，股價跌一半都正常啦，但市場先生暫時認為，兩成夠了，至於合唔合理，似乎是一個拗唔出結果的辯論，去年五、六十倍PE都一樣升，是否合理呢？
澳門特首賀一誠在2月4日午後突然宣佈，賭場將暫停營運半個月，並呼籲居民切勿外出，賭股即時急挫，銀娛（027）極速急跌6%，低見50.40元，其後跌幅收窄收市，以當日之恐慌，正常都會認為賭股有排衰吧，停賭場半個月唔見幾多錢呀，仲唔蝕死咩，現在半個月差不多過去了，銀娛本月的低位，就是那天午後的50.40元，最近一日新增確診病人，已是2月4日，換言之今天正是第十四天，澳門政府亦陸續安排公共服務恢復，當然你亦可以繼續認為，他們隱瞞疫情而已，冇確診都唔代表有客去賭囉，大陸人都唔落得嚟。
青冰沒有水晶球，實在沒法預測疫情幾時完，但市場經驗提醒，股市總會比危機早走出低谷，究竟海底撈及銀娛是否已率先見底，不用拗，日後自然會有答案。
青冰
www.fb.com/chingbing888
本欄逢周二刊出
大茶飯 - 青冰 舊文
來源 source: http://hk.finance.yahoo.com