資料圖片
武漢的重要性，在於其位置。中國有句成語叫一言九鼎，因為古代分為九個行政區，亦即九州。夏禹收天下金屬鑄成九個
鼎，象徵握有天下王權。武漢就位於荊州，被稱為九省通衢，係非常重要的交通樞紐。
一個地方成為重要的交通樞紐，城市發展必然發達。清末列強叩門，最國際化的城市當然係上海，第二係邊個？漢口。當香港人仲捉緊魚時，《芝加哥論壇報》叫當時的漢口做「東方芝加哥」，可見其國際化程度。時至今日，假如將湖北獨立出嚟睇，其GDP同波蘭、瑞典相若，可在全球排20名左右。正因為武漢地理位置如此重要，一出事，輻射範圍廣闊，傳播迅猛。
疫情爆發，中國經濟陷入癱瘓，雖然中共促復工，但不樂觀，從兩個角度睇。根據內地交通部數據及證券行統計，按全國返程客量估計，復工人數不到30%，即係話大部份人仍然留喺屋企。其次按發電用煤量觀察，目前為去年同期50%左右。過去春節期間發電用煤量會急跌，春節過後又會急升，現時仍未出現急升，就係復工率不足。
量寬若失效恐釀戰爭
由於近30年中國作為世界工廠，中國經濟癱瘓，開始明顯影響其他國家。比如南韓現代汽車及KIA汽車，由於中國零件供應中斷，其南韓本土部份工廠要停工。武漢向來係中國汽車工業重鎮，中國生產的汽車零件，有25%出口至美國，10%出口至日本，德國及南韓各佔5%。既然南韓車廠受影響要部份停工，美、日、德睇庫存重有幾多貨，影響即將浮現。
面對疫情影響，上星期聯儲局主席鮑威爾表示暫時唔會有乜嘢動作，但如果美國經濟將來步入下滑期，聯儲局可能再次出手以QE同前瞻指引救市。2008年金融海嘯，經濟學家預期會出現如1929年的大蕭條，結果由聯儲局為首，各國央行以量化寬鬆逃過一次蕭條期。
疫情不退，中國經濟蕭條係必然。要保經濟，在疫情未退時要求復工，會否引來第二波爆發，係眾人憂心之事。現在講因為中國經濟出問題而引發世界經濟出問題也許太早，但聯儲局的手影反映美國有第二手準備。當下進入世界銀行早年預計的大宗商品超級周期末段，第一次印銀紙可以逃避循環，第二次是否可以？如果不能，那接下來要面對的恐怕就係戰爭。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.entertainment.appledaily.com