美股期貨隊到熔斷，油價單日插三成，美國10年債息跌至0.3厘，今次市場恐慌程度絕不比2008年
金融海嘯低，恒指昨日跌4%，相對來講算係理性。
「個市係咪玩完？應該點做好？」每日直播節目以至fb inbox，都收到大同小異的問題。如果由頭到尾都係100%持倉，我諗已經輸到麻木，應該唔會睇到呢個專欄。手頭有現金想撈貨的，建議先問自己一條問題︰「如果聽日個市跌多1,000點，你頂唔頂得順？」以現時過山車市況，甚麼事情也可能發生，心理質素差啲，一個gap down足以震走你。
好喇，夠曬心理質素坐貨，落雨不怕落雪也不怕，實際操作應該點呢？首先，揀定強勢板塊部署，我嘅心水依舊係科網、5G、內需、物管股，配以防守性較高的收息股及績優股。其次，唔好估底，呢個專家同你講22000點係底，那個高手話20000點先係底，事實係冇人知道個底喺邊，最簡單係每次大跌都買一注。講好似好容易，但當坐貨越來越多，心理壓力亦隨之上升，加上呢場仗應該要打好耐，分注吸納都要量力而為。怕風高浪急嘅，可以直接揀盈富基金（2800）。機會係跌出來的，你夠唔夠膽捉住呢個機會呢？
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.entertainment.appledaily.com