港股再次彈散，利淡傳聞不絕，包括有指大型基金爆倉，贖回潮一觸即發雲雲，上星期五恐慌低位22500一質即穿，藍籌一片紅海，最叻係電能（006）力保不失。騰訊（700
）星期二還在講炒業績，昨午已經掟到一街都係貨，除非閣下身手敏捷，否則無謂亂博反彈。
跌市零推介，不如講嚇炒股故事。還記得2008年金融海嘯時，我揸住其中一隻股票就係中移動（941），當時市況唔比而家好，同樣係日日跌、天天跌，最終在跌穿50元一刻忍痛止蝕，恒指有趣地在同日宣告見底。去番2020年呢一刻，中移動再次失守50元，當日沽貨的畫面彷彿重現眼前。
「計埋除息因素，𠵱家嘅50蚊比當年50蚊高好多喎。」冇錯，咁樣比較唔係咁公平。大家又不妨望嚇散戶愛股之一中國人壽（2628），計埋除息因素，今日股價已接近金融海嘯水平，即係當年在別人恐懼你貪婪時一刻撈國壽，十二年後的今日，竟然係原地踏步，如果你買最保守嘅盈富（2800），升幅講緊倍倍聲。炒股票一定要合時宜，一剎那光輝唔代表永恒，如果你蟹咗的股票，已不再受資金追捧，一坐可以講緊十年甚至一世，所以經常都話，跌市係沽劣質貨換入優質貨的良機，共勉之。
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.entertainment.appledaily.com