上星期本欄預言A股步入熊市將成黑天鵝，A股立即響應本欄預言，連日下跌，直至周五才喘定。可見要知道股市未來走勢，睇「笑到最後」最穩陣。
彭博數
字顯示，港股市賬率（PB）已跌至1倍樓下，比2016年更低之餘，再對上一次低位，已是1998年及1999年。資產大平賣，係咪恒等於現時衝入場買便一定成功撈底？坐時光機回到98年及99年，當你見到個PB咁殘，跟住衝入去，買當年最穩陣嘅退休股電盈（008），之後會發生咩事？唔用咁極端嘅例子，恒指及後至03年都冇咗一半。如果今日見滙控（005）9厘息好平，衝入去嗰啲，高明只能講句祝你好運。
因為比起估值市賬率，一個更準確嘅見底訊號，就退休人士嘔番份退休金出嚟，然後要出返嚟做嘢。97年有8號仔，08年有雷曼迷債，事實上，08年本來滙控萬劫不復，不過QE救返。今次暫時仍未發生，最多都係減派息同送少啲紅股，但按照過往慣例，越覺得息率高、好穩陣、揸正股唔驚，最後洗牌洗得最勁。
股市始終有一日會習慣武漢肺炎嘅存在，甚至乎，即使疫苗研發速度慢過預期，各國封關鎖國唔畀出街令經濟活動冰封，最後都會因慣咗而重投股市。即係話，個市慣咗疫情之後，準備要面對中美貿易戰再開始，本欄預期，美國會就疫情損失，搵中國埋單，包括中國兩年要買2,000億美元美國貨，必定如期執行。
最後，最新香港最自由經濟體被搣柴，畀新加坡瞓喺度贏咗香港，亦都反映咗外資開始唔信香港。金融中心嘅地位靠一對手掌拍響，首先要有例如普通法、英語水平、背後市場潛力等一掌，然後更重要係外資認同你，同你gimme five。唔認同香港嘅明示暗示漸漸出現，今浪見底後港股仲係咪好選擇？
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.entertainment.appledaily.com