市場反彈越急，之後急轉直下嘅話跌幅亦會更急。上周五個股反彈動力其實比3月13日急得多，尤其最後一小時成
交量係跌市新高，然後，夜晚道指升轉跌超過900點收市，確有可能快速將市況打入更恐慌狀態。不過，星期日中東股市預示市場情緒狀況，結果杜拜股市下跌2%，似乎算冷靜反映周五美股跌勢，恐慌情緒未見急劇惡化，要睇埋周一朝早各項環球市場指標，任何新聞都唔夠反映市場情緒嘅指標重要，因為新聞已經夠曬負面。
呢一刻要做定心理準備嚟緊一星期可能發生乜事。如果周一開市早段，樂觀嘅話，美股期貨有反彈，港股低開高走，有足夠交投配合，持貨當然仍可且戰且走。相反，如果原本見頂在望嘅恐慌指數期貨上升，美股期貨逐步單邊下跌，就要小心。穩陣起見，周一最遲上午市明確決定短線去留。究竟已見短期底抑或最恐慌一幕仍未出現，留多兩日定避開兩日，一個決定可以差好遠。
除咗先度定唔同劇本，預想操作，同樣重要嘅，係袋定一批明天會更好嘅number喺身，一定冇死。市賬率低過1倍唔代表見底與否，但至少代表股票進入難得特價時段，尤其優質股，可見未來有可觀回報等緊大家。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com