武漢肺炎全球爆發，目前只有兩個希望：一，發現有效治療方法；二，成功研製疫苗。
近來已經唔少消息指
，雞尾酒療法，或者可以控制部份患者病情。即係，至今仍然未有definite嘅治療方法。事實上，藥物對病毒感染，最多都係控制下併發症同身體反應，對病毒本身絕大多數情況其實都係束手無策。
至於疫苗，最樂觀都要一年先至測試完；而且求神拜佛，病毒唔好再出現變種。換句話說，除非病毒好似當年沙士咁，無端端消失於空氣之中，否則我哋只有兩條路：一，在可見將來，繼續目前嘅social distancing；二，當無事發生過，好似大陸咁復工復市。
就算發現到有效控制病情嘅藥物，最終亦研發出疫苗，我相信今次廿一世紀大瘟疫，將會根本咁改變全球政經文化。首先，肯定大家都更加關注公共衞生。從前，大家都將呢個責任交曬畀政府同跨國官僚。今後，大家都清楚唔可以信曬公營部門。個人同企業嘅「覺醒」，意味公共衞生將會同環保一樣，成為社會責任嘅一部份；ESG嘅新定義，未來幾年應該會有更具體深入嘅討論。
其次，當然係全球供應鏈，唔可以再集中響一個資訊唔流通嘅地方。以前大家會以為，做生意，都係買買賣賣，出口入口，從來都冇諗過，一個信唔過嘅政府，一個冇得講真話嘅社會，原來都係一個風險因素。
最後，當然係大家對風險嘅認識同意識。真正嘅危機，就係出現一件「不可預知」亦「不可控」嘅事件；而人類文明嘅進步，就係將「不可控」，變成「可控」，「不可預知」，變成「可預知」。願天祐世人，阿門。
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://hk.entertainment.appledaily.com