一個月前，孫柏文同獅子山學會主席王弼傾起武漢病毒，當時，歐美加都係得啲零星嘅引入個案。當時我同王弼話：
「呢單嘢要完，應該要全球、同時武漢式封城廿八日先得。不過係要國際合作，所以好難。」
我分享呢件事，原因係覺得好慚愧。我哋呢啲舊自由主義信徒，居然睇唔到自發秩序嘅威力，因為一個月後嘅今日，全球各地所有政府自我封關十四日。不過兩周後，應該又封多十四日。驚？係。不過起碼全球人類卒之知有幾嚴重，全世界醒曬。黎明前的黑暗，我亦開始感到樂觀。
對資產價格會點？以前嘅世界，例如1918年嘅西班牙流感，死咁多人後，就應該出現好勁嘅通縮。不過，我哋見到全球政府係咁印鈔、派錢托市，真係好難講。因為千祈唔好低估政府能摧毀貨幣購買力嘅能力。
今周開市，美帝指數期貨又喺亞洲時段跌停板，原因係美帝救市草案喺佢哋國會參議院撠住咗。點解撠住？參議院係共和黨控制，不過因為有議員中招或隔離，唔夠共和黨議員入去投票。民主黨當然藉機塞啲共和黨員唔肯接受嘅嘢入草案。
當美帝議會運作被咁樣影響，選舉結果、民意授權不能彰顯，其實係墮入咗憲制危機。記得上次08年，當時財長入咗個兩頁紙嘅草案入國會，上面只係話：「畀行政機關8,000億美元，總統鍾意點使就點使。」最終都係要拖咗好多日，再被國會大幅加監管條款，兼個市日日深深咁隊落去，先至通過。不過都係嗰句，萬億美元都不能令人體體溫維持37度。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com