武漢肺炎全球爆發，各地股市齊齊free fall，散子身邊有啲朋友開始上
彈，準備起勢撈底。的而且確，相對於恒指三萬點嘅時候，兩萬二嘅恒指係平好多，但平嘢可以更平，越撈越低情況早在2月中已經出現，俾個市打完一巴又一巴的實例一次又一次重演。
正如之前二月初本欄所講，既然今次跌市由疫症而起，要復蘇都要睇疫情；歐美各國最近先推出一連串措拖防疫，甚麼在家工作，減少外出之類，就算今日大陸工廠開番工，一時之間，由原本工廠無開工，無生產，至現時生產產品都無人出街買，而且這只是個開始。
根據香港嘅經驗，最少要兩三個禮拜先至試嚇復工，仲有可能行番work from home，就好似現時嘅香港咁，股市由一月底農曆年開始跌第一浸，今個月更加係跌鑊甘；雖則今個月全球股市一鑊熟，理論上唔多唔少都反映咗今日疫情。
不過，現時講「全球復工」言之尚早，無事嘅話，都起碼要一頭半個月，之後就係公司公佈首季業績，政府公佈首季經濟數據嘅時候，數字雖不能準確預測，但卻能夠想像，若想像與現實相符，都仲可以博一下；若不符，又要硬食多幾棍，咁樣撈底又何必急於一時？
散子
http://fb.com/散子-257101397966975
Can Bank - 散子 舊文
來源 source: http://hk.entertainment.appledaily.com