物管股鑫苑服務（1895）周二發通告，擬回購最多2,500萬股或5%股權，為期約一年；董事會認為，現價未能反映公司內在價值及實際業務前景，乃回購股份良機。簡單而言，管理
層認為現價殘到爆，要做嘢修復估值。
鑫苑究竟有幾殘？不妨用股價秤秤︰龍頭物管股碧桂園服務（6098）、雅生活服務（3319）、保利物業（6049）等，近日全部逆市破頂。鑫苑呢？依然在上市低位徘徊。「喂！人哋全部龍頭，鑫苑size咁細，邊有得比？」OK，又睇嚇盤數，鑫苑去年總收益增長35.8%，毛利增長51%，毛利率增長3.8個百分點，盈利增長6.8%，只因包括了上市費用等開支，絕不比同行遜色。現價市盈率8倍唔夠，對比龍頭全部四五十倍，兩折大平賣，差距大有收窄空間。
咁咩價先算合理？假設上返10倍PE，股價可見2.4元，潛在升幅26%，依然偏低。還有兩點要留意︰第一，上市當日曾飆高逾倍至4.2元，證明炒作基因強大；第二，最新市值僅9.5億元，卻連續多年榮膺中國物業服務百強企業，說穿了又係潛在併購對象，昨日逆市升一成，已得到市場重新注視，相信好戲在後頭！
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.entertainment.appledaily.com