冰說聰明 - 青冰 2020年4月16日
香港電視（1137）旗下HKTVmall生產的口罩，首日有120萬人登記，用抽簽形式去爭3,000個口罩，顯示HKTVmall品牌的魅力，也代表香港人對王維基的支持及認同。
兩個月前曾寫過日本城的母公司國際家居零售（1373），當日的概念是日本城有清潔用品賣，又有高息墊底，是不錯的選擇。早幾日佢哋主席接受報章專訪，內容含金量頗高，當中有兩大重點，就是生產口罩及疫情對生意影響輕微。
主席話農曆新年後集團上下都努力撲口罩，亦遇上被瘋狂cut單，最後要叫員工親身去當地，即場睇實生產兼驗貨，順手帶貨返來，有見及此，就決心生產自家的口罩，機器買咗原材料都訂好，預計兩條生產線在5月可投產，未知屆時會用咩方法開售，但睇嚇HKTVmall同口罩相輔相成，有利網購生意及品牌效應，同理，日本城亦應受惠。
專訪亦漏了口風，指疫情對生意打擊有限，近期本地零售股接連發盈警，日本城的年結是在4月底，若受打擊應會影響全年業績，不過按主席咁講，睇嚟這幾個月民生用品賣得幾好，盈利未致受大影響，換句話說，極大機會可維持派高息，繼續這個連續七年不減派的優良傳統。政府每月代支人工9,000元，集團有約2,100個員工，即係每個月收返近2,000萬，半年隨時袋返過億，再者疫情下日本城應忙過之前，唔增聘都不會裁員啦，直接受惠派錢政策。
上月環球股災時，國際家居股價曾低見1.55元，近期雖反彈了兩成，但現價仲有接近8厘息，在零息環境持續下，點都值博過劈租潮的收租股吧，別忘記股壇長毛David Webb在1月時增持，入貨價都係約1.84元，現價只係高一格，口罩在5月投產，業績在7月公佈，相信現時係最佳的收集期。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com