【笑到最後】特朗普今年會雙贏 - 高明
如果特朗普連任，相信美股會繼續慢牛，然後一年一度巨型洗倉。資料圖片
去年底美國經濟及股市雙高時，唔少本地華文評論都表示特朗普連任冇問題。不過，一場疫情，令選情出現變數，華文評論立即支吾以對。喺大家都唔敢估嘅時候，本欄再度領先同行，走出嚟話畀大家知
：特朗普今年將會連任美國總統。
今年武漢肺炎疫情，令好多人覺得特朗普做得唔好，所以會影響到佢選情。處理得唔好，要鬧，係正常，但武漢肺炎唔係佢發明，只要唔好攬上身，合理咁將隻鑊卸返去武漢肺炎發源地，其實並唔會傷。喺選票壓力之下，特朗普由一開始將武漢肺炎同流感拉埋一齊嚟講，到中間已質疑世衞隱瞞疫情，到近日文宣狂轟中國，事實上隻鑊已卸。
相反嘅係，疫情先係連任原因，十大民主國家領袖民望平均上升9個百分點，每逢出現大型事故，有不確定性時，人民就祈望依賴政府，即使乜都冇做過，都畀咗like先，對執政黨有優勢。類似情況有如香港行政長官林鄭月娥一樣，大家明知疫情受控同佢冇關，但武漢肺炎令佢民望低位回升。
不過，多個民調顯示民主黨拜登支持度領先，令市場對特朗普連任產生猶豫。民調同選贏嘅距離有幾遠，四年前已經發生過一次，當時大部份人都覺得希拉莉會贏，因為每一個民調都顯示希拉莉民望領先，高明反而日日喺電台講特朗普會當選。
以上投票意向，喺民調同撲咪時，口中會愛自己發源國，但到閉門投票，真正意願先會反映出嚟，四年前已試過一次。上屆特朗普輸票數贏選舉，經過四年後，大家知呢位人兄原來會堅做，本欄預言：今次連票數同選舉雙贏。如果特朗普連任，對資產價格嘅影響，相信美股會繼續慢牛，然後一年一度巨型洗倉。至於中國，世界工廠已完，周邊新興國家，借中美局勢搶走定單。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://s.nextmedia.com