【冰說聰明】限聚放寬受惠者 - 青冰
醫思醫療主席兼行政總裁鄧志輝。資料圖片
限聚令終於放寬，唔少飲食股應聲彈起，戲院、美容中心及按摩中心都可以重開。經過幾個月的封閉式生活，港人長戴mask或WFH已經成為習慣，青冰雖然係不修邊幅，但都坦白承認，這些生活令肚腩大咗，皮膚都差咗，跑步就話可
以落街箒，但女士們保養塊靚面，始終係去美容中心最好，而市場都係極有效率，必瘦站（1830）已在周一爆升13%，如果唔想高追，另一隻美容股香港醫思醫療（2138）都諗得過。
這幾個月美容業的經營狀況，肯定慘不忍睹，不過醫思醫療在上月已派定心丸，話截至3月底年度的銷售額，按年仲有得升，好天斬埋落雨柴，算係不幸中之大幸。
相比起其他上市美容股，醫思醫療並不是美容獨大，按半年業績披露，醫療保健業務仍佔三成收入，當然最賺錢梗係美容啦，但在美容停業的艱難時期，有醫療保健頂住，份業績將較其他同業優勝。
零售業最難捱的，其一就是停業不能停交租，你見大地產商的租金寬免措施，都係因應行業及個別情況，逐個月都同你計的，而醫思醫療上周同冠君房託（2778）的協議，真係新穎。話說冠君房託旗下的朗豪坊辦公大樓，最大的租戶就係醫思醫療了，上周決定向冠君房託發807萬股新股，作價4.19元，涉資3380萬，用來抵銷租金，印公仔紙代交租，相信唔係太多業主會肯，但在這時間將就嚇共渡時艱，租戶負擔輕咗，實是雙贏局面。唔好睇少呢三千幾萬呀，已經是去年度純利的一成，隨時就是下年度的還魂丹。
用1月的高位同3月低位比，必瘦站及醫思醫療分別下跌56%及45%，不過必瘦站從低位幅度反彈72%，醫思醫療只有34%，作為行業龍頭，財務數字又更穩健，無理由落後咁多，所以點秤都係醫思醫療更具值博率。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://s.nextmedia.com