【收市閒情】走數、染紅 香港新常態 - 千頌C
大陸要谷內需，適逢香港殼價瘋狂大平賣，國企又點會唔把握機會，完成國家任務？資料圖片
一場武漢肺炎，令大家更明白，咩叫never say never。你又點估到，油價會變負，原來ETF都可以好多人炒燶，又原來真係一班人，死都唔肯信口罩係有
用。正如曼德拉（可能）講過：「延誤疫情足以摧毀地球」（Delayed pandemic warning is the collapse of the world）；地球摧毀之前，將會出現一系列新常態。
首先，本來一個搞唔起嘅remote office潮流，全世界無啦啦兩星期內搞掂咗。於是，開始有公司索性搞WFH Forever！繼Twitter後，港產startup 9GAG都話已棄租荃灣7,000呎總部，永遠WFH。
當然某啲性質嘅公司，真係唔可以冇咗office。聽到好多業主都呻，唔少租戶發窮惡，索性唔交租。疫情之前，你又點估到，竟然會有上市公司，為咗交租索性配股畀業主。月初醫思醫療（2138）為交5個月，夾埋3,390萬租，於是折讓1%左右，向冠君產業信託（2778）配售約807.89萬股，相當經擴大股本約0.8%。
經濟環境差，「以股代租」呢啲另類找數方法，相信會越來越多；更加可以肯定嘅係，資本市場走數事件亦都會越來越多。
生意難做，走到末路，走人套現都係一個出路。先施（244）、Bossini（592）此類香港老品牌，都要賣畀大陸佬；中資亦開始攻入香港公用業務。家陣，大陸要谷起內需，相信短期內會發動唔少新項目；適逢香港殼價瘋狂大平賣，國企又點會唔把握機會，完成國家任務？
資本、商業市場嘅新常態，係走數、染紅；而香港嘅新常態，就係指黑為白，作為行政長官，為夾硬批評歷史科試題，試圖引經據典，that"s fine。但佢竟用一句未經fact check嘅說話作論據，實在係匪夷所思。如果你問我，香港的實相是甚麼，是冇真相。
註：第一段那句唔係曼德拉講，是曲的。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://s.nextmedia.com