【魚樂無窮】食糊盤VS撈底客 - 唐牛
美股上周出現島形頂走勢，暫時易跌難升。較早前美股彈力驚人，現價獲利空間十分大。 資料圖片
疫情2.0殺到，北京疑似失守，地球另一邊的美國肺炎人數急彈之餘，研究更指病毒有變種危機，觸發美股期貨在亞洲時段急插，道期曾瀉近千點，拖累恒指午市越跌越深，埋
單挫524點收報23776點，20日及50日線全失守。
呢轉調整有幾深？圖表派話美股出現島形頂走勢，暫時易跌難升。實際啲講，今趟美股彈力驚人，納指更創出新高，換句話說獲利空間亦十分大，即係所謂「咩位沽都贏」，疫情升溫成為埋單計數的原因。另一邊廂，各國救市印到一街都係銀紙，水浸自然要搵嘢買，這亦解釋到點解疫情未過但股市先破頂。呢轉獲利盤遇上撈底資金，邊個位先係平衡點？相信有水晶球都未必睇得清，與其夾硬估底，不如靈活變通，分注吸納新經濟股，應該係最佳方法。
巨騰國際（3336）5月中預喜，由於在家工作及網上學習人數大增，商用性和教育版本的筆記本電腦的出貨量增加，令集團收入上升，加上收入以美元計價，生產成本則用人仔，食正人仔貶值潮，估計中期可扭虧為盈。如今肺炎恐慌升溫，集團抗疫概念重現，2.4元乃合適上車水平，上面當然博破2.75元，跌穿2.2元止蝕。
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://s.nextmedia.com