【金手指】幾時投降去追貨 - 孫柏文
較早前睇住啲股價日日升，好多人都諗「追唔追好？」。答案好簡單，如果畢菲特再買，就係跟入之時。 資料圖片
做得孫柏文嘅fan屎，應該喺武肺前將手上資產大減磅，跟住就喺三月嫌啲資產價格未夠平下，冇買，或者買唔夠貨。
之後當各國央行瘋狂印鈔，出現我嘅女神
胡孟青青姐嘅名言「風大起上來，垃圾都吹得起」時，就睇住啲股價大幅反彈，好似美帝科技股咁創歷史新高，你嘅腦裏，應該同我一樣日日問：「追唔追好？」
到今日，我都仲係喺三月低位後冇增持。現金比重好重。連啲避美大陸科技股嘅港板上市都唔參與玩首日鮮。冇錯，喺咁嘅情況下，睇住啲股價日日升，確實係個煎熬。就算活過好多好多次嘅熊市反彈，當見啲央行咁全心去摧毀貨幣購買力時，真係唔好話唔考EQ。
不過，周末本報有篇報道，幫我穩按兵不動之心。報道就係講話美帝啲航空股喺低位升番幾多，之前不斷沽手上航空股嘅股神畢菲特，被放大題，話佢執少咗十億美元。喺我記憶當中，對上一次畢菲特喺咁不斷被攞出來笑，近乎被話「uncle 你唔get」，就係千禧年第一次dotcom泡沫嗰次。嗰轉，連不斷話啲股價黐曬線嘅大鱷索羅絲，都忍唔住喺近高位投降追科技股。畢菲特呢？冇。當年結局如何，大家心照。
就係咁，我𠵱家諗「追唔追好？」時，答案好簡單。畢菲特再買，就係跟之時。否則，永不投降去追，視升市為浮雲。因啲股價真係浮雲般了。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://s.nextmedia.com