智取大市 - 晉佳 2020年6月1日
【智取大市】調整後買貨首選美團 - 晉佳
美團喺ATMX之中，調整後仍然係必然首選，皆因市值未完全反映增長潛力，短線難估可能回到乜嘢位置。 資料圖片
上星期五MCSI換馬，有成132億追蹤MSCI嘅資金一次過接美團（3690）沽盤，同時美團單日有85億沽空盤睇準MSCI接貨，預示之後會chok到暈。
美團係全中國外賣同旅遊平台霸主，至於市值相若嘅美股Shopify係全球網店解決方案霸主，能夠炒到癲，純粹因為各自嘅市場規模極大，兼且市佔率高，未來變現潛力非常大。
收入規模同埋變現能力計，目前美團可謂拋離取Shopify，後者目前可以值近千億美金，市銷率高達50倍，美團1,100億美金相比下變得物有所值。無論美國定係中國嘅第一梯隊科技股升到近高位普遍遇阻，資金蜂擁第二梯隊，短線似有調整壓力，始終美團年半之內由低位升2.5倍，近期成交波幅誇張，已經不宜窮追。而美團喺ATMX之中，調整後仍然係必然首選，皆因市值未完全反映增長潛力，短線難估可能回到乜嘢位置。長遠嚟講，如果升到目前Netflix市值，就見240蚊，估計美團未見明顯盈利之前，強勢依舊。
「港版國安法」令港股下挫，同期外圍股市表現不差，霎時間港股成為環球龍尾。假如嚟一個挾淡倉，港股藍燈籠追落後，到時美股都要小心可能進入新跌浪，始終累積升勢已多，不可不防。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com