【笑到最後】三大理由見萬九點 - 高明
預計未來12個月，恒指最低見19033點，至於幾時開始跌，合理懷疑會托到網易、京東上市。 資料圖片
特朗普香港時間周五淩晨回應中國在香港實行國安法立法，網上反應普遍認為冇料到，公佈後美股急升，夜期跌幅收窄，新加坡黑期至周日截稿前報23206點，升323
點。不過，高明認為並不合理。
取消香港獨特地位，並唔係好似一般評論咁講，純粹數貿易量嚟計。全世界最後都係使美元、睇美國頭，對中國取態可能都顧忌三分，但唔經香港則唔使畀面。國家定性咗香港一國一制，垂直有唔同嘅政策搣柴，橫向有其他國家跟。
更重要原因：北水來港因為香港制度唔同。美國搣甩加持，情況等如國際學校冇鬼仔鬼妹，仲用普通話上堂，中資返多兩個學期見唔對路，冇耐就會退學，直接去歐美升學。
至於港股本身問題，恒指近年大跌後反彈，往往反彈力度不足，但出現個別版塊狂炒，今日嘅ATM同B股，就好似當年眾安（6060）、閱文（772）、易鑫集團（2858）、雷蛇（1337）同醫藥股，港股成份嘅問題，令資金會投向其他概念，消化咗港股嘅升幅。但每次港股下跌之前，資金都係走入盈利同前景不明嘅股份份度。
大家可能會話，美股仲升緊、恒指PE好低，冇理由再跌。事實上，2018年下半年，美股一路創新高，港股就尋底，兩者冇乜關係。至於恒指PE依家9.55倍好低，但如果用彭博今年底預測已經10.81倍，盈利預測有冇低估武漢肺炎影響？亦更肯定冇反映香港一國一制嘅影響。以往有北水發大財，估值都係10至11倍，失美帝加持，10倍已經唔能夠話平。
如果睇圖，2018年高位下跌後，恒指橫行足足4個月後下跌，跌幅21.99%。預計未來12個月，恒指最低見19033點，至於幾時開始跌，合理懷疑會托到網易、京東上市。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://s.nextmedia.com