【操盤手劄記】股市現馬太效應 - 割柑人
內地股市昨日爆升5.7%，想食A餐，最簡單係揀A股ETF。 資料圖片
股市，就如人生，充滿ups and downs。今年上半年，肺疫爆發、股市熔斷、油價負值、股市牛轉熊再轉牛，好有幻海奇情feel。
下半年開局，各地股市普遍向好，中港股市進
入技術性牛市，「七翻身」應驗？
港股牛氣沖天，但舉頭三尺有國安，國安法引發嘅國際政治風暴，香港正喺風眼。該法第38條提到，非港人喺外地嘅行為都適用該法。法律學者陳文敏就質疑，若美國總統特朗普勾結英國首相約翰遜對付中國同香港，係咪都瀨嘢。美國會點反應？
周一，中港股市分別爆升5.7%同3.8%，兼有大成交配合。恒指收26339，重上250天牛熊線，短線上望3月高位26800關，以至27000關。今趟升市，由A股帶動港股，資金開始由原本強勢嘅新經濟股rotate out，轉向相對廉宜嘅舊經濟股。
其實，環球股市3月下旬至今已回升唔少，中國創業板同美國Nasdaq指數迭創新高，反映新經濟股成為擠擁交易，馬太效應（Matthew Effect）明顯。馬太效應係指好嘅越好，壞嘅越壞，多嘅越多，少嘅越少嘅現象，即兩極分化現象，來自《聖經》馬太福音一則寓言。
新經濟股回氣，舊經濟股接力，但ATMX中，阿里巴巴（9988）、美團（3690）下月有望染藍，小米（1810）呼聲亦高，仍可留意。恒指公司兩年前推出嘅恒生中國新經濟指數，三大成份股正係騰訊（700）、阿里、美團，可惜該指數並無ETF可買。
想食A餐，則最簡單係揀A股ETF，如南方A50（2822）、安碩A50（2823）、華夏滬深三百（3188），前兩者追蹤富時中國A50指數，後者追蹤滬深300指數；亦可揀被視為A股proxy嘅內險股。
割柑人
本欄逢周二刊出
操盤手札記 - 割柑人 舊文
來源 source: http://s.nextmedia.com