【中環在線】陳德霖買公共年金撐自己 - 李華華
當年日理萬機嘅陳德霖話如今宅在家煲劇。《AMIGOS》圖片
金管局前總裁陳德霖退休後，罕有咁同大家分享理財之道。大家係咪以為有冧把落袋？Sorry，陳總係叫大家買佢有份推出嘅公共年金箒。
話說陳總接受按揭證券公司旗下電子雜誌《AMIGOS
》最新一期訪問，劈頭講三件事，包括中美貿戰、肺炎同負油價，去印證市場好難預測；同時又抨擊一大堆理財產品，包括存款冇息收、高息股波動、高息債風險高。佢自爆除咗有政府長糧，自己一到65歲就即刻買年金。
雖然訪問冇講佢投保咗幾多錢，睇怕陳總都應該用盡300萬元個人額度，即係每月都有萬幾蚊落袋，唔需要擔心市場大上大落，收到錢會用嚟請家人、老友飲茶。
最後，陳德霖重提一次退休後都係運動，又話「凡是圓的東西都有興趣」，但佢話近排停操一兩個禮拜，已氣喘如牛，咁近排有乜做呢？原來宅在家煲西班牙神劇《紙房子》，套劇講械劫印鈔廠，佢想知賊人點策劃，因為金管局都有間印鈔廠喎。唔知佢睇完有冇心得同余總分享呢？
李華華
mailto:LiWaWa@AppleDaily.com
中環在線 - 李華華 舊文
來源 source: http://s.nextmedia.com