【大茶飯】提升估值的遊戲（青冰）
【大茶飯】提升估值的遊戲（青冰）
提升估值在股市出現得比較多，現在是準備上科創板而提升估值，以往是H股比A股折讓而炒差價收窄。更多
無論戰友是否同意，現時市場似乎強勢已成，壞消息對股價影響少而短暫，好消息就炒到不亦樂乎，散戶可能會拘泥現在是否牛市，但又係唔
係咁重要呢，外國勢力教落，股指從高位回吐兩成是技術性熊市，這些指標在十年前，應該還是有用的，但戰友回想三、四個月前，全球股指急瀉，全線出現技術熊市，股神在首季大幅減倉，仲唔係有排跌？有說今次唔同，係狂印資金做出來的資金市，但只要你有返咁上下股齡，就知有邊次升市唔係由資金推動呢？
上周的升市極之全面，唔少大市值股份都有火氣，各有故事，其中一個係回歸科創板，提升估值，中芯（981）剛為科創板上市定價為27.46人仔，本周接受認購，回看通告，中芯在5月5日公佈董事會通過建議發行A股，當時股價係15.26元，現時回看，兩個月內倍升。吉利（175）在6月17日公佈回科創板上市，當時股價是11.90元，消息公佈後唔算升得多，而上周五忽然又拎出來炒，單日急漲12%，往後是否癲到倍升呢，等著瞧，不過青冰就戥早前配股的接貨者高興，5月底以10.8元配售6億新股，個零月已輕鬆執了五成。
提升估值這回事，係兒戲嘅，公司質素及營運情況不一定有顯著改善，只係因為類似資產賣得貴，所以這個就係抵買喇。這情況在股市出現得比較多，現在是準備上科創板而提升估值，以往是H股比A股折讓而炒差價收窄，或者是行業龍頭炒到天價估值，行家顯得便宜而追落後，即使放在樓市，經紀都會同你講，同類單位都賣都好貴的，所以呢間係抵買嘅。諸如此類的分析及評論，在旺市將會趨普遍，但在火旺市況資金渴求冧巴之時，識搭順風車又識落車，亦未嘗不可。
石藥有潛力爆炒
除了中芯及吉利，石藥（1093）在5月底亦宣佈建議回科創板上市，以當日收市價計，現價只高5%，戰友可以密切留意，不過上星期亦傳出第三輪的帶量採購即將落實，這政策每次出台，對個別藥股有利有弊，當然要睇你隻藥是否今輪目標，最佳的入市時機，相信係政策出台後，大行報告講完一大輪是否受惠，跟住都會提返，回歸科創板有利提升估值喎，石藥應是行業首選雲雲。
青冰
http://www.fb.com/chingbing888
本欄逢周二刊出
大茶飯 - 青冰 舊文
來源 source: http://hk.finance.yahoo.com