【大棋局】股市吹牛風再現 - Mr. Tregunter
內地上市公司由美國搬到香港，所為的是錢。不要忘記大戶係22000點入貨，外圍局勢亦隨時出現突變。 資料圖片
星期一恒指升近1,000點，成交2,500億，已補回3月時留下的周線大裂口。周線較少留大裂口，所以今浪
反彈不少人睇有機上番26000點左右。現時裂口已回補，係咪意味升完？
另一邊廂，內地A股上星期開始再吹牛風，跡象有四：其一，券商股係咁升。A股2014年大升，券商股係領先指標；其二，內地媒體再次出現吹牛風，同樣2014年亦出現過；其三，低估值股陸續消失；其四，出現散戶排隊開證券戶口。
香港股市早已不是反映香港經濟，所以有冇得升，要睇大陸。從A股過去大升市睇，金融海嘯前的牛市，即2008年前，內地券商股不但非領先股，而且係落後股，升埋就差唔多玩完。2014年則屬領先指標，2015年中股市開始大跌，2016年至2017年的小升市，券商股冇特別表現，非領先亦非落後。所以重點在，由於2014年係人造大升市，所以有人會醒水，券商股便領先。
2014年人造大升市其實係一場改革實驗。西方先進國家的金融市場，由直接金融主導。一間公司想籌錢，主要會從股市、債市自己想辦法，由市場去決定這間公司的借貸成本多少。中國唔係，內地直到現時仍然由間接金融主導，即好大程度由國有銀行決定你借唔借到錢。要發展直接金融，須股市興旺。股市旺唔起，先會有叫銀行讓利指令。
人造牛市不易重來
結果大家都知道，內地管制一鬆人就興奮，炒到你爆為止。由於2014年教訓距今不遠，要再來一次人造牛市不易，官方唔敢放太多孖展，散戶亦冇咁易信到十足。至於低估值股陸續消失，美國、歐洲、香港等股市今年出現過大跌，往後雖然估計會經濟衰退，但現階段處於恐慌後的修正。即疫情一旦緩和，陸續復工，也只係修正跌過籠，有反彈，冇牛市。內地今年其實冇點大跌，所以不存在新周期重臨，低估值股消失代表已去到中場，而非初升。
香港問題，仍須從錢的角度看。內地上市公司由美國搬到香港，所為的是錢；恒指成份股轉換，MPF是大客，所為的也是錢。既然為錢，香港金融的作用就須要留，起碼現階段如是。恐怖氛圍，從執政者角度係減輕其管治成本。既然為錢，股市就要升，炒起個市就如QE。就算去到中場，一般會玩多兩三個月等人入場。但不要忘記大戶係22000點入貨，外圍局勢亦隨時出現突變。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://s.nextmedia.com