【金手指】各位，後會有期！ - 孫柏文
國安法宣佈埋啲條文後，我真係唔知他朝會遇見到啲咩大鑊嘢，分享之後惹來大禍。 資料圖片
2008年9月30日，雷曼倒閉冇幾日，尹思哲寫咗篇題為「拘捕孫柏文」嘅文。當時，有人喺網上正確講出東亞銀行（023）有好多次按有關嘅資產，所以就話有錢喺嗰度嘅人應
該攞番為安。而嗰位網友，亦極速被差佬拉，告「不誠實使用電腦」。
尹思哲就喺佢篇文問，如果呢條友都拉得，咁喺06、07、08年係咁話啲銀行將會因美國按揭爆破嘅孫柏文，又點解唔拉呢？我揸住份報紙搵佢，第一句問佢：「玩到咁大呀？」佢笑住咁答：「條題都好搶嚇啊？」跟住我哋就一齊笑。𠵱家？我諗番起，已經再笑唔出了。
6月30日嗰晚，宣佈埋啲條文後。我睇完都有諗過，小心啲寫咪得囉，避某啲議題，就冇事。不過大家做我fan屎咁多年，應該都知我嘅性格係點。點會忍到呀？我真係唔知他朝會遇見到啲咩大鑊嘢，分享之後惹來大禍。
最可惜係，當資金分配系統，啲人覺得冇人能獨立咁check，賣方有資訊不對稱嘅優勢時，啲買得嘅嘢，股票好或債券都好，就會好似啲二手車咁，一落地就要打大折扣先會有人覺得抵買。一個嚇嚇賣嘢，都要賤賣先有人吼嘅「集資中心」，咁就搞爛咗。
我由十幾年前第一次寫《金手指》，每篇文嘅假想讀者都係我老竇。就係因為咁，永遠唔想執筆時覺得有嘢唔講得。今日則要同各位講，多謝咁多年嘅支持，後會有期！
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://s.nextmedia.com