操盤手劄記│運費爆上 航運股等派彩（割柑人）
操盤手劄記│運費爆上 航運股等派彩（割柑人）
全球化之下，原材料、製成品，以至食品等，唔少都依賴海運，運費上升，自然推升物價。
有減無加！上周五，美國聯儲局主席鮑威爾喺Jackson Hole全球央行年會演說，市場緊盯美國收水部署，因為
係全球貨幣政策嘅風向標。會上，鮑威爾重申今年開始縮減買債合適，但暗示不急於加息。其實，今年已有部份國家因應疫情受控、經濟復蘇，幣策由放水轉收水。就喺央行年會前夕，南韓亦宣布加息，係亞洲首個喺疫情下加息嘅國家。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
市場終於等到鮑威爾嘅鴿派講話，歐美股市應聲急彈。美國長債孳息下跌，美股三大指數上升，標指、納指破頂。不過，港股喺美國掛牌嘅ADR跟唔上，尤其中槪股，ADR恒指比例指數收報25378，較恒指收報25407低29點或0.1%；納斯達克金龍中國指數更跌1.1%，可能受到監管消息影響。據路透社講，中國計劃禁止涉及數據安全風險嘅科網企業境外上市。
中國出港運費 年升4倍
由2月開始嘅通脹辯論至今，鮑威爾仍然認定通脹飆升屬暫時性，但唔少領先指標都顯示，通脹就快爆錶。相對當時嘅通脹訊號，例如油價、工資升幅，現時更重要嘅通脹訊號，係貨櫃運費升幅！由中國到美國運費，5月後火箭咁升。中國出港運費，1年已升4倍。疫情之下，環球船運嚴重堵塞，3月又發生貨輪卡住運河，塞船更嚴重。製造業交貨延遲時間，創40年最長。
全球化之下，原材料、製成品，以至食品等，唔少都依賴海運，運費上升，自然推升物價。本來聯合國糧農組織食品價格指數喺5月升至127.1嘅10年最高水平後，6月剛有回落跡象，但8月又發生阿富汗變天。該指數喺10年多前急升後，發生阿拉伯之春，係地緣政治風險領先指標。喺運費、糧價等大升之時，市場卻跟聯儲局押注通脹回落。美股標指今年已52次創新高，有望打破1995年嘅77次紀錄，創新高次數都創新高！如果市場無押錯注嘅話。
中遠海控 有望恢復派息
不過，運費趨升係不爭事實。中信建投估計，內地各大口岸、東南亞主要港口、歐洲主要碼頭擠塞情況持續，供需失衡加劇，9月主幹航線或有新一輪加價。港股之中，經營貨櫃運輸嘅航運股，包括海豐國際（1308）、東方海外（316）、中遠海控（1919），前者專營東南亞內航線，後兩者則涵蓋全球航線。至於經營乾散貨運輸嘅航運股，就只有太平洋航運（2343）。
東方海外日前公布中期業績，半年賺28.1億美元，按年增26.5倍，派中期息每股1.76美元、特別息每股2.65美元，合共4.41美元（34.398港元），派息比率達98.2%。中遠海控將於今日公布中期業績，早前已發盈喜，預計半年賺370.9億元人民幣，按年增31.6倍。中遠海控2018年收購嘅東方海外豪派股息，滙豐研究估計，中遠海控亦將恢復派息，成為股價催化劑，並上調目標價至28元，重申「買入」評級。該股現價14.5元，不妨留意。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com