泰國都有納米樓？
早前有報道「Thai developer Sansiri targets Hong Kong buyers with‘affordable’mini flats in Bangkok amid glut」，內容大概是有泰國發展商瞄準香港買家，
推出面積小至231方呎超迷你公寓，售價約50萬元，呎價約2,165元。講到港人「專吼納米樓」同「唔細唔鍾意」。
香港情況是，供求失衡，樓價高企，普羅大眾埋怨買唔起樓，於是發展商為「成全大家上車心願」，縮細單位、降低入場價，用「林鄭Plan」，800萬元以下可借九成，令更多人可做業主。納米樓有助提升房屋落成量，站在發展商立場，交到數，呎價又可進取，何樂而不為，攞盡未來幾年溢價，以不超過800萬元為目標。但納米樓二手價幾危危乎，頻出現蝕讓個案，翻查多個納米樓盤成交數據，近3、4年落成、少於200方呎開放式，蝕錢機會最大，就算賺都只是三幾個巴仙，分分鐘使費都賺不到。現實來說，納米樓難滿足長期需要，用家客未必會承接，投資客又會睇價錢，市道好還可以，逆市時缺乏抗跌能力。
至於泰國，標題講明「供過於求」，發展商建納米樓不是因地價高漲、土地不足等原因，認為投資50萬元舒舒服服，他們就將貨就價。但問題是比香港更易買難放，這類二百方呎納米盤，本地用家唔會吼，海外投資者選擇多，買一手有優惠，買二手大把有得揀，單計該區開放式單位放售，某地產網逾430個，而且交投淡靜，半新樓呎價較新嘅平一半。在香港肯低於市價，基本上都有承接，泰國的話，難講！
泰國都有納米樓？
HEA富專欄 - 郭釗 舊文
本文作轉載及備份之用 來源 source: http://www.am730.com.hk