【平民投資教室】錢俊：聚焦矽谷銀行後續發展
平民投資教室
日期：2023-03-14
更新時間：09:33:21
上周五驚爆美國矽谷銀行危機。成為2008年雷曼爆煲後最大銀行倒閉事件。直至周末美國政府同聯儲局仍不停撲火。有對沖基金巨頭甚至認為美國政府應拯救及阻止該銀行倒閉。
以科技公
司為主要客戶嘅銀行出事，或者係時間問題。聯儲局不停加息，銀行買債不斷蝕錢，加上未有盈利嘅科技公司要還債就百上加斤，還唔到錢就令銀行壞帳問題加劇，爆煲在所難免。
至於事件會否火燒連環船？錢俊覺得機會較低。2008年金融海嘯後，各國對大到不能倒嘅金融機構及銀行要求定得比天高，比如銀行嘅流動性資本要達到某一個水平，先可以繼續借錢出去。甚至之前要求銀行發行所謂Coco bonds嘅應急可轉債，當銀行資本充足率不足，或股價低於某一價格，或財務指標低於監管層要求時，銀行就可單方面停息兼強制將債轉股變現，以支持資本水平。因此現時嘅防風措施應該足以應乎小型銀行造成嘅危機。匯控唔怕出事肯收購矽谷銀行業務，或證明大家未聞到燶味。
然而，矽谷銀行倒閉是否只係冰山一角，需要睇多幾日甚至數月發展如何。2008年時嘅次按危機，初時都係直接涉足建屋及次貸業務嘅公司先爆，之後到房利美房地美，然後先到雷曼同AIG。
因此未來幾日要繼續睇嚇美國聯儲局同政府嘅反應，包括下星期議息會否放棄加半厘，甚至暫緩加息以應對事件。
SPLV：美股的避風港
風頭火勢又唔想揸cash仲有咩選擇？市面上當然有好多反向ETF可以揀，但市場chok上chok落，買錯時機隨時玩完。另外亦有一啲以期權及期貨生成嘅ETF，用衍生工具嚟防風，但對投資初哥及穩陣派投資者嚟講可能唔敢沾手。另一招就係轉倉買啲穩陣投資，傳統智慧就係買港燈煤氣中電嗰啲公用股，不過近幾年因公司策略及自身原因，好多投資者都坐曬呢幾間嘢嘅蟹貨。
Invesco S&P 500 Low Volatility ETF（US: SPLV）或者係其中一個避風港。基金投資美股標普500入面，過去12個月波動性最低嘅100間公司。簡單嚟講就係買曬藍籌入面最安全嗰啲股票。一方面無涉足大上大落嘅公司，而且做到分散風險，唔怕單一公司或行業受危機所牽連。
成份中，公用股佔23%，消費必需品佔22%，成份股有醫療健康股強生、百事可樂、麥當勞、高露潔等。呢類公司比較一成不變，無論經濟好壞，消費者都要使用其商品及服務，業務亦佈滿全球，因此股價都係穩定為主。
穩定背後，就係好難對佢嘅表現有太大期望。過去五日標指跌4.8%，SPLV只跌3.4%，雖然做到抗跌效果，但標指過去五年間仍累升40%，SPLV只得25%。因此當風暴離開時，就就宜走出comfort zone。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com