【平民投資教室】錢俊：槓鈴投資策略買港股美股
平民投資教室
日期：2023-06-13
更新時間：10:11:19
上週美股重拾動力創一年高位，港股又好似有啲起色。怕買現時高追美股買貴貨，又怕無趁低撈港股，可以點樣部署？
投資方法上有一招叫Barbell strategy，有人譯做「
槓鈴策略」。簡單講即係若果當投資市場所有可投資嘅項目放曬上一條線，就買線上嘅兩端，中間嘅項目就唔買甚至沽空套現買埋兩端，令投資組合「頭尾重，中間輕」。
槓鈴策略好似賭檯上大細都買一樣。好處就係儘管其中一方唔升，另一方都有機會幫你嬴返啲錢。如果你以港股美股作為兩端嚟買，以今年至今為例，美國標指今年已升12%，港股恆指跌3%，若果你每邊都各買一半，總回報仍然做到約7.5%，都算叫做尚可接受。而且投資市場唔係大同細二分，兩端都可以一齊嬴，若果港股下半年回勇跑嬴返美股，喺港美股票嘅槓鈴策略下都唔會因為無貨而輸太多。
缺點當然就係有機會兩邊都輸，類似賭檯開圍骰被莊通殺。事實上以主要市場嚟講，今年最好要數到日本市場，日經平均指數今年已升26%，係美股標指升幅嘅一倍有多。無買到就只能大嘆走寶。
總括嚟講，投資市場變幻莫測，最終走勢始終無人估到，與其買死一隻股票或一個市場，不如買多一兩個甚至更分散嘅投資類別以免大炒車。
FLJP vs DXJ：買日股ETF應否對沖日yen
如果你想高追日股，又唔識買同揀當地股票，最簡單當然係買喺香港或美股市場上市嘅日股ETF。錢俊去年介紹過香港只有一隻日股ETF，而美國市場就有更多選擇。
當中最抵之選係Franklin FTSE Japan ETF（US:FLJP），投資數百隻日本上市股票，管理費只係0.09%。然而睇返表現，年初至今只有14%，似乎與日經嘅25%有段距離。
表現大不同，投資成份唔同固然有一定影響，另一點就係匯價。除咗開返關，今年吸引大家去日本嘅原因就係日圓繼續向下，兌美元比年初跌最多9%，因此用美元或港元買日股，就會「賺價蝕匯」。唔想咁樣，可考慮一啲同日圓對沖嘅日股ETF。比如WisdomTree Japan Hedged Equity Fund（US:DXJ），年初至今升24%，扣除管理費可以話追貼日經指數。
然而日圓是否仍然向下存在變數，市場不斷有消息指日本央行考慮調整所謂收益率曲線控制（YCC），被喻為係結束超寬鬆貨幣政策嘅轉捩點，到時日圓弱勢將被改寫。若日圓向上，投資DXJ就會跑輸FLJP，加上對沖成本令FLJP管理費高達0.48%，都係考慮因素之一。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com