中環在線：大出局日火燎森熄火 - 李華華
爽組合出局森哥後會無期了
大家睇股市，成日搵另類指標去估後市，估唔到《爽報》財經版嘅300萬爽組合變咗做政壇指標！比亞迪(1211)噚日跌至$13.62，參賽者之一火燎森出局，梁班子嘅麥齊光亦都同日出局，都咪話唔巧合。梁班子家吓風雨飄搖，爽組合入面另一參賽者孫柏文亦「叫緊糊」(現時跌逾三成，四成就要出局)，唔知佢出局之時，係咪又有另一司/局長被叮走呢？
火兄死忠於比亞迪
華華打去問火兄感想，佢用好平淡嘅語氣同華華講：「預咗，因為買入時機唔係咁好」，唔知麥齊光飲廉記咖啡時係咪都係咁諗呢？火兄又話，自己對比亞迪有信心，覺得未來5至10年電動車會改變世界，打算股價跌到12蚊會再入，跌到10蚊再溝。
火兄又話，自己個倉有比亞迪，所以想玩遊戲都言行一致。至於今個跌浪傷唔傷，火兄就話，流動資產只佔佢組合嘅5%，咁多年有做其他投資，例如樓、舖、生意等，其他做啱，所以今日資產同當日比已經係另一個境界。臨別秋波，佢好大方，「希望其他參賽者順風順水」，又話家係熊市，唔應該咁快定輸贏，投資者最緊要做番自己，「如果買入嘅原因到呢刻都一樣就要繼續」。
華華覺得，若呢個指標成立，梁班子最唔想孫柏文出局，因為怕且又有高官落台！唔怪得有人話要搞港版淡馬錫啦，原來要用嚟托住孫柏文組合個表現！
300萬爽組合：
2012年7月12日
下午4時收市
火燎森以負40.07%回報率宣佈出局
李華華
mailto:LiWaWa@AppleDaily.com
上一則: 百營揭舊賬查換股債
下一則: 中環在線：霍嘉治退休抗癌 - 李華華
中環在線 - 李華華 舊文