中環在線：炳江囝囝成摩之路 - 李華華
新鴻基地產(016)大股東兼兩位聯席主席郭炳江同郭炳聯上星期正式被廉署檢控，佢哋兩個仔臨危受命，分別幫阿爸做替代董事。外界對兩位公子所知有限，不過郭炳江囝囝郭基煇(Adam)因為曾經喺摩根士丹利工作過，所以投行中人對佢比較認識。
聽Adam喺大摩嘅舊同事講，雖然佢家庭背景猛料，但從來無牙斬斬，都係勤力做嘢嘅年輕人，佢同中信泰富(267)前主席榮智健細仔榮明棣(Andy)同期，06至07年喺大摩工作，可能大家都係富三代，當時特別老友。至於現年29歲嘅Adam乜嘢樣？舊同事叫華華幻想吓郭炳江後生嗰陣係點喎。
Adam喺大摩當然係學做刁，其中一單刁就係幫內房股合景泰富(1813)搞上市。當年新股市場同內房股都㷫烚烚，隻隻都話有大孖沙入飛認購，非常搶手。Adam有份做呢單刁，當然預埋老竇同世叔伯一份，郭炳江、恒地(012)主席李兆基都有認購。
囝囝做刁老竇捧場
當年條街唔明郭炳江做乜無端端高調玩呢隻新股，原來係要支持個寶貝仔。新地後來仲同合景及富力(2777)合作搞個廣州獵德綜合項目，認真出力。
不過華華好想知道郭炳江沽咗合景未，事關合景07年中上市，招股價7.28元，幾個月後高見15.36元，升成倍，但呢個已經係歷史高位，隻股之後係咁跌，金融海嘯嗰陣跌到得番1.19元，噚日收報4.73元，如果上市揸到家都輸緊35%。
李華華
mailto:LiWaWa@AppleDaily.com
上一則: 拆解疑點魏橋電廠執笠有後着
下一則: 中環在線：波浪大師1.3億買磚頭 - 李華華
中環在線 - 李華華 舊文