金融High Tea 2012年7月17日
金融High Tea——盈警潮 攞你命
2012年7月17日
■中興通訊發盈警，集團預計中期純利減至1.5至3.1億元人民幣，按年跌60%至80%，遠比去年同期的7.7億元低。新華社
昨日內地股市又大插，拖低港股。內地上周公佈第二季度GDP增長只有7.6%，老外話「唔係硬着陸」當好消息炒，杜指上周五大升203點，當好友以為美股咁升法港股有運行之際，估唔到就被A股打殘。
關鍵係阿爺自己唔係睇得咁樂觀，溫總昨日明確指出，當前經濟還沒形成穩定回升形勢，經濟困難可能持續一段時間。領導評論負面，加上大量新股登場，內地股市昨日認真唔靚仔，開市之後一路下滑，上證綜指以全日最低位收市，插38點，至2148點，有過百隻股跌停板，深圳A股指數大跌3.7％，睇落幾得人驚。上證綜指過去兩年的低位是今年1月造的2132點，而家跌跌吓又試跌向低位。
A股尋底綁石游水
港股面對內地咁差形勢，即使美股上日升咁多都無用，朝早高開173點本來已經令好友失望，你唔信以為唔應該升咁少，撲入去買就弊啦，恒指開市後愈跌愈多，下午最多倒跌31點，要等3點A股收市後才有番少少反彈，恒指收19121點，少升29點收場，但大市成交少得可憐，只有352億元。
中環茶友話，內地A股一日未見底，港股就好似隻腳綁住嚿大石游水，你話點游得高，唔潛入水底都偷笑囉。
唔好睇大市無乜嘢，昨日好多股份大插，大跌股榜中，出現不少內地的大中型股份，佢地唔係受盈警潮影響，就係被內地同業暴跌拖累，大插特插，例如中興通訊(763)跌16％，鐵江現貨(1029)跌14％，TCL通訊(2618)跌12％，保利協鑫(3800)跌10％。你若短炒一成止蝕，一日就到位打靶。
通訊設備股的慘烈下跌由龍頭股中興通訊(763)發盈警帶動。中興通訊預計，中期純利減至1.5至3.1億元人民幣，按年跌60%至80%，遠比去年同期的7.7億元低。大摩下調中興通訊2012年盈測，目標價由19元下調至14.5元，評級維持「增持」；摩根大通就唔係咁睇好，評級降至「減持」，目標價睇10元。
中興通訊昨日沽盤湧現，成交超過4億元，股價勁插至10.46元，一跌已跌近大摩的目標價，係表現最差國企成份股。同業TCL通訊亦發盈警，話今年上半年純利將大幅低於去年同期，雖然佢話今年第二季比第一季有增長，但亦無助股價，昨日大跌至2.04元。
池水甚深 控險為要
太陽能多晶硅龍頭股保利協鑫大跌10％，雖然佢自己無公佈壞消息，但內地昨日多晶硅、電子器材、陶瓷等多個板塊暴跌，內地多晶硅公司亦發盈警，市場有理無理沽埋保利協鑫一份。
中興通訊、保利協鑫都係大股，而家都開始跌到變晒型，有網友話當年28元買過中興通通訊，35元沽出，估唔到昨日跌到11元有找。有網友15元買咗問點算？
我認為內地股市咁殘，又遇着企業出盈警，即使大股都畀人狂質，一破位就觸發大量止蝕盤，有啲不問價沽貨的感覺，都幾攞命。我認為首先要分自己係投機定投資，投機唔使問，一博唔到，跌一成就打靶。
投資要量力而為，中興也好，保利協鑫也好，破位後還有下行壓力，雖然有人覺得佢哋跌得多有價值，但千祈唔好愈買愈多，買夠唔好再溝淡，單一股份唔好超過自己組合20％，否則一隻股深跌就搞死你，若手上貨太多或太集中，應減持唔係增持。A股跌浪呢潭水幾深，控制風險為上。
陸羽仁
上一頁 下一頁
金融High Tea 舊文