金融High Tea 2012年7月4日
金融High Tea——限購唔死無錢死
2012年7月4日
■內地汽車業人士表示，因為經濟唔好車市本來疲弱，但廣州繼北京後實施限購令，其他省市的消費者加快買車決定，汽車推銷員多了一個叫人買車理由。新華社
放假返來，港股仍有少少強勢，但內地股市無料到，上證綜指先升後回，走勢一個小山頭咁，收2229點，只升0.1％，差不多原地踏步，拖住港股後腳，幸好內地三點收市後港股好番啲，升番294點收市，升幅遠勝內地。
中資保險股表現標青，國壽(2628)獲保監會同意發行10年期和15年期次級定期債務，股價急飆4.4%至20.85元，財險(2328)亦抽高4.6%至9.07元。反而睇內銀股就睇到內地弱勢，四大行只有農行(1288)升2.9％升得勁啲，其餘三大行都跑輸大市，傳聞6月四大行貸款只有1600億人仔，唔係咁好環境。
廣州市在六月三十日晚突宣佈，七月一日零時起，廣州對中小客車實行限額制，未來一年，配額為12萬輛。廣州是繼北京後再成為有汽車限購令的城市，由於過去廣州月均出車1.9萬輛，新制限定月均只能出車1萬輛，出車量大減，令到前日內地汽車股暴跌。睇番昨日香港上市的車股雖然跌，但無內地咁誇張，好似表面上受影響較大的廣汽(2238)跌4％，都唔算跌得好犀利。
內地媒體廣告大跌
證券商都唔係睇得咁淡，瑞銀估計廣州汽車限購對整體行業銷情影響有限，但短期內會影響投資者買汽車股的情緒。2011年廣州乘用車銷量為25萬輛，只佔全國銷量的2%，估計實施限購令後令全國銷量下降幅度僅有1%；佢相信在廣州銷售份額較高車廠和豪華車影響大一點，例如日本車在廣州的份額高於全國平均，故廣汽將受壓，平治等豪華車亦有壓力。在交易商方面，預計大昌行(1828)受影響最大，而對中升(881)及正通(1728)的影響有限。(昨日大昌行和正通股價仲上升，只有中升下跌)
我同內地汽車業人士傾過，佢話限購令不止負面影響少，還可能有正面影響，因為經濟唔好車市本來疲弱，但廣州繼北京後實施限購令，其他省市的消費者本來心大心細諗緊買唔買車，會加快買車決定，所以廣州的禁令，令其他地區的汽車推銷員多了一個理由叫人買車。佢話「限購唔死無錢死」，內地車市真正問題是經濟唔好，令買車的人減少。
房地產和汽車本來是媒體廣告大客，以廣州為例，如今兩樣都唔得，媒體近期廣告隨時減少三四成！內地經濟唔好，亦係股市疲弱的主因。聽佢講完，我估在北京辦報的北青媒體(1000)，都唔係咁好景。
猛虎難敵地頭蟲
早前獨立調查公司Citron Research，指恒大地產(3333)「資不抵債」，令到恒大市值一日蒸發近80億元。內地有傳媒對這間公司大起底。Citron Research戰績好彪炳，過去六年來先後狙擊了20家中國概念股公司，其中15家股價跌幅超過66%，7家已經退市。
不過，今次狙擊恒大，多家大行都指萊福特所提供的資訊並非全都準確無誤。恒大主席許家印表示正在考慮是否對香櫞研究提出訴訟。萊福特近日已有些底氣不足，話不能用「舞弊」(fraud)及「欺騙」(cheat)，這些強烈的字眼。只能說「他們採用了非常激進的會計方法(very aggressive accounting)。」不過，考慮到執法地區問題，Citron Research過去5次被起訴，最終全部勝訴，猛虎難敵地頭蟲也。
陸羽仁
上一頁 下一頁
金融High Tea 舊文