中環在線：城中富豪「飛佛」半島月餅嚟喇!! - 李華華
下月30號先係中秋節，但最近已經見到好多月餅廣告，出名嘅月餅亦要呢個月訂購。半島酒店嘉麟樓奶黃月餅就係不少城中富豪同企業老闆至愛，每到中秋就一百幾十盒咁訂嚟或送禮或自用，聽講東亞(023)主席李國寶太太潘金翠都有幫襯。
舊年嘉麟樓就破曬紀錄，開始接受訂購當日，六個鐘就賣曬全部6.2萬盒月餅，搶手程度拍得住Lady Gaga嘅演唱會飛!嘉麟樓公關話，今年師傅加碼整6.5萬盒。呢個月16號開始接受訂購，想買嘅話，可以喺酒店網頁下載表格，電郵、fax或者親自去嘉麟樓交表，9月1號有得攞。
銷情咁好，嘉麟樓亦唔客氣加價30元或13%，今年一盒月餅要258蚊!美國運通半島金卡卡主早幾個月已經可以訂貨，公關唔肯講暫時去咗幾多貨。照咁睇，粉絲都係惟有早啲交表嘞。
九龍酒店有得揮
再唔係，半島同隔離嘅九龍酒店喺04年之前都係屬於大酒店(045)，聽聞兩間酒店以前用同一個奶黃月餅食譜。雖然04年底大酒店賣咗九龍酒店畀長實(001)、和黃(013)，但食過九龍酒店龍逸軒奶黃月餅嘅人都話味道同嘉麟樓差唔多，今年同樣加價30元，賣208蚊一盒，平過嘉麟樓。
李華華
mailto:LiWaWa@AppleDaily.com
上一則: 國策透視：「金牌」經濟的意識形態 - 郭小民
下一則: 中環在線：安踏李寧眼花繚亂 - 李華華
中環在線 - 李華華 舊文