金融High Tea 2012年9月26日
金融High Tea——積極撈地 房企還陽
2012年9月26日
■景福珠寶昨朝早開市後一枝箭升兩成，收市仍有14.5%斬獲，收1.34元。資料圖片
港股昨日玩下上落市，朝早升得急，但跌得快，中午逐步扳平，恒指收市原地踏步，微升4點至20699點，國企指數弱，跌22點，收9745點。大市成交連續第二日唔夠400億元。內地A股仲靜，無乜升跌。十一假期臨近，市場水緊，人民銀行在公開市場上分別進行14天和28天「逆回購」操作，合計放水2900億元，創有史以來單日逆回購最高紀錄。
昨日最生猛的是早前講過水泥股，廣東英德礦山爆炸，意味着炸藥供應將受預期停產或會持續兩至三個月，廣東水泥價大升。由於華潤水泥(1313)在英德沒有生產線，所以應該是這次生產中斷的最大受益者，昨日大升4.9%至4.72元。
十一快到 概念短癮
「十一黃金周」好快就到，又係傳統炒鐘錶珠寶相關股的黃金時候。不過今年內地經濟低迷，無論係做生意或者做投機，都無運行。所以出埠花費都無以前咁豪，鐘錶珠寶股上半年插完，近月炒吓反彈，炒到九月中本來無以為繼，開始跌番落嚟。景福珠寶(280)唔知乜緣故，昨日朝早開市後一支箭咁飆升兩成，之後回順，收市仍有14.5%斬獲，收1.34元，唔好忘記佢去年全年都只係賺3600萬，而家炒近一年高位，有16倍PE咁高也。六福(590)升2.2％、周大福(1929)升1%，小心十一概念炒作好短癮。
新華網話，今年1至8月，全國房企買地面積2.4億平方米，比對上一年下降16％，其實房企在8月開始較為積極買地，9月以後更甚，9月10家大型房企中仍有三家(萬科地產、華潤置地和恒大地產)出手買地，合計資金達95億元。龍頭房企加快買地，但取價還算合理，不會如前兩年那樣瘋狂追價，主要基於它們財政狀況改善，同時亦有補充土儲的需要，另外地方政府推地力度加大，推出優質地塊，吸引了房企入市。
一葉知秋，房企9月開始加快拿地，多少反映它們無咁手緊，若然本月水乾，即使見到靚地，都唔敢出手去攞，反而會趁市場有需求，減持手上地塊，所以有錢有膽攞地，至少反映本身不至於乾塘，房企可謂「還陽」了。
股價高升 小心批股
內地經濟在第三季仍然放慢，股市又跌到2000點邊緣，阿爺雖然唔想樓價上升，但確實沒有太多空間可以大力打壓樓市。短期內樓價即使不升，只要阿爺銀根鬆啲，新盤可以去貨去得較快，發展商的資金鏈就可以回復運轉。出晒名大大聲的華遠地產董事長任志強有名言，話今年發展商無錢大大放慢了動工速度，明年下半年房價又要大漲。不管呢個分析有多真實，但好多內地人相信。
房企買地潮雖然暗示了內地樓市的正面發展，要小心買得地多的房企要融資，龍湖已批股集資，股價升得多的房企批股融資的誘因較大。
陸羽仁
上一頁 下一頁
金融High Tea 舊文