投資的天空：落後板塊快追上 - 張士佳
前日A股藉中央經濟工作會議召開而急彈近3%，帶領港股成功解除雙頂威脅。
士佳早排話睇好，主力係買衍生工具，皆因個股升勢實在太集中於幾個板塊，在值博率高低之下要有所取捨。過去幾日，強勢的仍然是那幾個板塊，自己睇唔中，好在有同事幫手揀中一些內房、燃氣股等，但整體而言，個股方面唔覺得滿意，係衍生工具就非常滿意。
不過，筆者認為，之後其他板塊亦會漸有起色，因先前投資者怕雙頂、怕內地跌唔停、又怕財政懸崖，基金要追數惟有向一堆極熱門板塊埋手，但A股一下爆返上2000點樓上，財政懸崖的問題也似乎越來越有解決的希望，市場的憂慮即使唔係一掃而空，亦已有很大程度的紓緩，這將有助其他無咁標青的板塊追上。當然，自己都唔係一面倒睇好，始終一日升返曬，亦可以一日跌返曬，現時係睇好得來，就逐漸將衍生工具減持，轉而買股票，並無特別加倉。
組合方面，吉利汽車(175)如跌穿3.42元，將先行沽出，因此水平是配股後低位，有一定意義，若失守，宜先行避開，為長期指令。
張士佳
元大寶來證券(香港)業務及商品發展總監
與曾卓鋒(元大寶來證券(香港)客戶經理)聯合執筆
(逢周三、五刊出)
上一則: 青心直說：美發窮惡殃及池魚 - 胡孟青
下一則: 炒友Blog：卡撒天嬌受惠城鎮化 - 邱古奇
投資的天空 - 張士佳 舊文