金融High Tea 2012年12月7日
金融High Tea——錢多抽唔乾
2012年12月7日
近日市況好轉，市場出現沽貨或批股的抽水潮，港交所(388)早前批股集資77.5億，匯控(005)又將手上的15.6%平安保險(2318)股份悉數出售予泰國卜蜂集團，套現727.4億元。東亞銀行(023)又落實向第三大股東日本三井住友銀行，配股集資33億，將令三井持股量增至9.5%。不過在資金流入的環境下，市場又好似唔係幾怕集資，而集資的股份，只要批股的折讓唔大，批完仲好似解除約束，反而有得升。
你睇隻平保同匯控，昨日股價靠穩，套現的匯控跌0.5%，失守80元，反而平保只跌0.2%，收60.35元。另一隻批股的東亞昨日亦只跌0.5%。呢個情況亦好易理解，因為佢哋的股票都係大手批俾單一股東，唔似一般批股咁流晒出街，自然無好大沽貨壓力，反而仲減少咗未來批股的擔心。摩根大通認為，匯控離場，反而有助消除短期對平保股價的不明朗因素，由於匯控一直未有積極參與平保的經營操作，對平保業務影響有限，因此重申「增持」評級。
農行可能買嘢
至於套咗現的匯控，市場早已預計佢會減持平保，所以無大反應。原因係匯控想借平保內地關係打開內地市場，但搞來搞去都無着落，況且匯控現時不斷蝕賣此前積落的有毒資產，手頭比較緊，等錢使也。蝕錢貨都賣，好似平保呢種賺錢貨，出手只係遲早問題。匯控一沽手頭上多番七百幾億，又減低了年底集資壓力。
東亞批股俾三井集資33億，當然無匯控沽平保集資700幾億咁震撼，但當中似乎股仔仲多，可謂一舉兩得，表面睇東亞可以充實資本，集資令其核心資本充足比率提升75點子至9.5%，資本壓力暫時紓緩。更重要的是寶哥哥選中第三大股東三井作批股對象，擺明係借此頂住一直對東亞虎視眈眈的第二大股東國浩(053)的攻勢。
東亞股權較分散，惹來大馬巨富郭令燦控制的國浩垂涎，國浩原本持有19%以上東亞股權，配股後被攤薄5%至14.23%。現從牌面看，親李國寶陣營的股東包括CaixaBank、三井住友、中銀香港(2388)及李氏家族，連同李國寶本人的持股量合共近40%，都可以頂得吓，減少被惡意收購的風險。不過從小股東角度，若有股權爭奪戰，炒高個價小股東最開心，若然戰火平息，無乜癮頭。
不過香港中小型銀行從來都是東南亞以至內地資金收購的對象，東亞現價30.2元，已經是15.4倍市盈率，爭爭吓已經唔平，另外一堆中小型銀行似乎亦併購價值，例如9.2倍市盈率的大新銀行(2356)、11.2倍市盈率的永亨銀行(302)，以及近日正作股權重組的創興銀行(1111)，即使股價已抽升，都只係12.6倍市盈率。若想博收購，可能博佢哋好啲。你睇農業銀行(1288) 用48.8億在中環買大廈設總部，佢又係內地四大銀行中唯一在港沒有零售業務的銀行，真係買番件都唔奇，所以古仔永遠有得講。
恒大漸入升軌
另外內房股表現不俗，龍頭股中海外(688)及華潤置地(1109)齊漲近2%。花樣年(1777)及中渝地產(1224)分別升6.3%及5.4%。有業界指內地住宅交投量下半年開始反彈，預計今明兩年將分別按年升30%和15%，樓價則輕微回升，預計北京和上海等一線城市樓價會有約半成升幅，好似無在香港上市的龍頭萬科，11月銷售又創年內高位，銷售金額171.3億元，同去年大增106.6%，是該公司歷史上第二高，高位是在2011年1月的201億元銷售額，暫時無內房公司破此記錄。
今年較落後的恆大地產(3333)上日公布今年前十一個月累計銷售額為846.3億元人民幣，提前一個月超額完成年度計劃，上日勁升近9%後，昨日輕微回吐2.2%至4元，我估佢會回多少少，但開始踏番入上升軌。
陸羽仁
上一頁 下一頁
金融High Tea 舊文