金融High Tea 2013年2月19日
金融High Tea——大戶樓市出貨勤
2013年2月19日
■市場估計，發改委或於下周上調油價，估計每噸漲幅約為350至400元人仔。新華社
■長實拆售葵涌雍澄軒。資料圖片
內地農曆年後首日復市，人人期望炒紅盤，結果內地股市玩相反跌0.5％，搞到港股都要微跌62點(跌0.3％)，一眾在內地無市時炒內地股市基金者被挾，偷步升咗的安碩A50基金(2823)跌1.4％收市，可見世事何曾是絕對。
內地有分析指，石油石化股將會係金融股後當炒板塊。國際油價在內地農曆新年假期間上揚達4.3%，已觸及內地上調油價的窗口，市場估計，發改委或於下周上調油價，估計每噸漲幅約為350至400元人仔，折合為汽油價格每升上調0.26元；柴油每升上漲0.3元。據以往經驗，發改委一般會在元宵後進行成品油價格調整。而分析指，若國際油價持續上升，預計元宵後原油平均價增幅或超過6%，如果到時至加成品油價，加幅可能會更大。
中石化逆市彈升
中國第二大石油公司中石化(386)上周末宣佈完成約28.45億股新H股配售，配股價8.45元，涉資240億元。股價由月初的9.4元急插至上周五的8.72元，受可能上調成品油價刺激，逆市反彈0.4%至8.76元，同系中石化冠德(934)就創一年新高。
地產股跌得多啲，市場有點怕財爺下周公佈的預算案有打擊樓市措施，雖然胡亂咁散播政府會出招的設計師已經被警察拉咗，但唔等如政府唔會出招噃，所以地產股都有啲腳軟，長實(001)跌0.6％、新地(0016)跌0.2％、新世界(0017)跌0.7％。
長實有理無理，加快拆售現成運作中酒店獨立房間，推出的是葵涌雍澄軒，呎碼是600幾呎和900幾呎，平均呎價5200幾元，兩房入場費339.4萬起，三房入場費453.6萬回報率，以現收租計回報約4.5厘。
妙就妙在佢係酒店物業，不用畀住宅的特別印花稅和限外地人買樓的買家印花稅，換言之香港人、內地人都可以即買即炒，唔論性質5000幾元一呎現今世代是合理價錢，有炒作水位，但五年前呢啲價係貴價，呢啲叫此一時彼一時矣。買佢呢個盤的唔好處因為工商物業銀行只可以按五成，借埋發展商二按先至借到七成，要畀多啲首期，但如今屯門二手樓都要8、9000元一呎，葵涌酒店樓5000幾元一呎可以去到貨。
長實快手拆售酒店
有中環茶友問我長實拆售酒店反映佢點睇後市？我就話佢睇淡啦。長實本來想在去年11月一次過將幾間酒店以類似房產基金的「合訂證券」形式上市，相關資產主要包括葵涌雍澄軒酒店、馬鞍山海澄軒海景酒店、紅磡灣海灣軒酒店、紅磡灣海韻軒酒店4家酒店，合計總出租面積332萬平方呎，共有4833間套房，當時市場估值百多億，但由於市道不好，長實最後決定放棄上市計劃。
想當日上得到市都要賤賣，如今拆開賣如順利去貨，可以套現更多。不要忘記這本是長實的收租物業，不是發展樓盤，如今是年頭，長實不是缺利潤要賣酒店房補數，不急賣而賣，顯而易見這是看淡樓市前景的套現行為，佢覺得如今以5000元賣葵涌酒店，將來賣不到這個價。
長實係樓市大戶，在樓市大牛市中，亦和股市一樣，往往係大戶出貨，愈出愈高，佢哋貨多唔可以第一口價就去盡，會留水位畀第一二浸接貨者炒吓，但你揸住唔放有胡唔食就貴客自理啦。
陸羽仁
上一頁 下一頁
金融High Tea 舊文