金融High Tea 2013年3月28日
金融High Tea——黃台之瓜 唔摘就笨
2013年3月28日
壹傳媒(282)老闆肥佬黎親自宣佈出讓台灣業務交易告吹，並聲言不會再出賣台灣報刊生意。肥佬黎講嘢信住佢兩成先，但呢次交易唔成，壹傳媒肯定受重創，肥佬黎真正係賠了夫人又折兵，散戶都應該喺呢單交易學到啲嘢，就係股價升唔沽就笨。
壹傳媒呢個46億交易不完成，訂金要退回，無訂金可殺。仲有仲有，壹傳媒本來在去年10月作價3億港元賣走台灣壹電視業務畀年代電視董事長練台生，後來殺出新買家要電視、報紙一起買，才終止與練台生的交易。壹電視年蝕10億港元，如今無端端揸多半年，等如蝕多5億(仲要短期賣得到)，真是偷雞不成蝕把米。
壹傳媒硬啃勁蝕
呢一役肥佬黎固然損兵折將，但不少壹傳媒股東無沽貨亦大歎走寶，呢個憧憬破滅的個案，都可以做一單教材。壹傳媒去年9月股價浮沉在0.7元左右，公佈台灣賣盤交易後，股價在去年10月18日大升至1.76元，然後反覆回，停牌前收市價1.17元，估計復牌後要大插。
我識得兩個朋友都有揸壹傳媒，一個好叻分段走清，我叫佢「老雀」；一個一股都無賣到，我叫佢「嫩雀」。「老雀」在1.7元、1.5元、1.4元三個位沽貨，平均沽貨價1.53元，如今睇佢好醒。我問「老雀」點解咁叻走清，佢答我「唔貪」，反正買回來炒，好多人計來計去計壹傳媒賣走台灣業務後值幾多錢，佢唔計，復牌日見試盤價1.7元，未開市已落定盤在1.7元、1.8元、1.9元分三批沽貨，佢話若然咁樣分批沽清平均沽貨價1.8元，佢會賺1.3倍，仲想點？結果上唔到1.8元，只沽了三分一。隻股回落，但到12月中佢見隻股炒高到1.7元又行人止步，一浪低於一浪，就搵位走埋佢。老雀話1.5元時沽可能錯過交易成功升上2元的機會，但交易不成1元都守唔住，佢就唔博啦。
至於「嫩雀」就好慘，一股都無沽過，原來佢揸咗呢隻股好耐，當年有100萬股，高峰期股價5元，佢揸的股價值過500萬(隻股曾經5合1，等如現價25元！)合併後佢得番20萬股，股價又大跌。我問佢做乜今次升到1.7元唔沽？佢話見過500萬之後，家1.7元都只係34萬，黃台之瓜，何堪再摘？而且佢亦睇好賣台灣業務後股價會高好多。我就話黃台之瓜，唔摘就笨！唔能夠話見過500萬，就唔執10、20萬，13年前美好的科網股高潮日子不去不返，做人都係現實啲好。散戶有時係咁，輸到無眼睇，但唔睇仲輸得多。同時太懷念過去的股價，唔肯接近隻股「永遠不能回到過去價位」的事實。
九倉發威受捧
講番大市，美股杜指創新高，內地A股先升後回順，上證綜指收市勉強企於2300點上方。恒指朝早一度高見22529點，升218點，挑戰20天線(22554點)無功不回。之後在高位橫行至收市，收報22465點，升154點，大市成交634億元。
地產股係推動大市向上的主力。恒生地產分類指數升1.7%。當中以九倉(004)表現最勁，去年業績靚仔，純利較上年多賺55%，派息按年增71%，大行齊齊睇好，高盛、瑞信、大和及花旗績後將九倉目標價分別升至73元、70.52元、78元及82元。九倉昨日勁升7%至68.95元。
如果九倉係天堂，恒大地產(3333)就係地獄。恒大去年銷售按年增14.8%，但盈利欠佳，毛利率由33.3%跌至28%，純利率由13.9%進一步壓低至9.5%，純利跌較上年少19%至91.7億元，為2010年以來低位。但就成功減債，淨負債率受惠年初配股集資由90%降至69.8%。
大行對恒大睇法普遍偏淡。高盛下調恒大今年至2015財年核心利潤預測10%、7%及1%，目標價由4.8元下調至4.7元，維持「買入」評級。恒大指首三個月銷情理想，有信心全年實現千億元銷售目標。副主席兼首席執行官夏海鈞表示，國家「城鎮化」的發展方向與集團的策略布局和發展脗合，對今年的銷售增長有信心，不過，認為「未來幾年都很難再出現高淨利潤率，能保持約10%水平，已經很好。」
陸羽仁
上一頁 下一頁
金融High Tea 舊文